Aqtaýda Qazaqstandaǵy alǵashqy Kaspii itbalyǵyn zertteý jáne ońaltý ortalyǵy óz jumysyn bastady, dep habarlaidy QazAqparat.
Búgin Ortalyq kommýnikatsiialar qyzmetinde ótken baspasóz máslihatynda QR Ekologiia, geologiia jáne tabiǵi resýrstar vitse-ministri Erlan Nysanbaev Kaspii itbalyǵynyń popýliatsiiasy boiynsha zertteýler týraly málim etti.
«Itbalyq – Kaspii teńizi faýnasyndaǵy teńiz sútqorektileriniń jalǵyz ókili. Túrli derekter boiynsha, olardyń sany 100 myńnan aspaidy jáne bul kórsetkish jyl saiyn tómendep barady», - dedi ol.
Erlan Nysanbaevtyń aqparaty boiynsha, «Sábi» qaiyrymdylyq qory «Ortalyq Aziia ekologiialyq zertteýler institýty» JShS-men birge 2019 jyldyń 6 tamyzynda Aqtaýda Qazaqstandaǵy alǵashqy Kaspii itbalyǵyn zertteý jáne ońaltý ortalyǵyn ashty.
Ortalyqty qurýdyń negizgi maqsaty - jaralanǵan jáne aýrý itbalyqtardy ońaldyrý, sonymen qatar jaǵalaýdaǵy eldi mekenderdiń turǵyndary arasynda túsindirý, ǵylymi-zertteý, halyqaralyq yntymaqtastyq, bilim berý jumystaryn júrgizý.
Erlan Nysanbaevtyń sózinshe, búginde Kaspiimańy memleketteriniń itbalyqtardyń sany boiynsha zertteýleriniń nátijeleri aitarlyqtai erekshelenedi. Sondyqtan naqty materialdardy alý úshin biryńǵai ádistemelik tásilderge negizdelgen birlesken zertteýler uiymdastyrý qajet.
Eske salaiyq, 2019 jyly «NCOC N.V.» kompaniiasy men Resei ǵylym akademiiasy A.N.Severtsov atyndaǵy ekologiia jáne evoliýtsiia máseleleri institýty ǵylymi yntymaqtastyq týraly kelisimge qol qoiyp, 2023 jylǵa deiin Soltústik Kaspii aimaǵynda Kaspii itbalyqtaryn zertteý baǵdarlamasy bekitildi.
