Irińdi meningit degen diagnoz qoiylǵan áskeri qyzmetker ótken jeksenbide qaitys boldy.
Lada.kz aimaqtyq basylymynyń málimetinshe, naýqasty emdeýge tájiribeli dárigerler tartylǵan, alaida olar sarbazdy ajaldan arashalap qala almaǵan, dep habarlaidy Sputnik.
"Soldat kóz jumdy, saǵat 9:33-te miy jumysyn toqtatty", — dep habarlady densaýlyq saqtaý basqarmasy.
Budan buryn habarlaǵanymyzdai, er adam 24 qyrkúiekte aýyrǵan. Ol eki kúnnen keiin basy aýyryp, ainalǵanyn jáne bórtpe shyqqanyn aityp, meditsinalyq kómekke júginipti. Dárigerler aldymen sheshekpen aýyrdy degen diagnoz qoiady, alaida bir táýlikten keiin soldatty teksergen dermatolog jedel tynys alý aýrýy bar ekenin anyqtaidy. Degenmen 30 qyrkúiekte jigit qusa bastap, esinen tanyp qalǵan.
Er adam komatozdy kúide aýrýhanaǵa jatqyzyldy. Zerthanalyq synaqtar júrgizildi, polimerazdy tizbekti reaktsiia taldaýy teris nátije kórsetti. Bakteriologiialyq zertteý ádisimen streptokokk bar ekeni anyqtalǵan. Keiinirek oǵan irińdi meningit diagnozy qoiyldy.
Dárigerler naýqaspen bailanysqan 355 adamdy tekserdi. Olardyń 18-i ózderin jaisyz sezingenin aitqan, 12-si oblystyq juqpaly aýrýlar aýrýhanasyna jiberildi: olardyń bireýi ótkir respiratorly virýstyq infektsiia juqtyrsa, 11-i profilaktikalyq maqsatta em alady.
