Aqtaý qalasynda dziýdodan erler men áielder arasyndaǵy Qazaqstan chempionaty márege jetti, dep habarlaidy "Ult aqparat".
Qazaqstan dziýdo federatsiiasy málim etkenindei, jarystyń sońǵy kúni tórt salmaqta myqtylar belgili boldy.
Áielder arasynda 78 kg salmaqta finalda shyǵysqazaqstandyq Nazerke Tileýhanovany utqan almatylyq Zarina Raifova jeńimpaz atandy. Taǵy bir almatylyq Madina Paragýlgova men aqtóbelik Aiala Merekege qola júlde buiyrdy.
Asa aýyr salmaqta (+78 kg) Almaty oblysynyń ókili Kamila Berliqash úzdik shyǵyp, osymen ekinshi ret el chempiony atandy. Soltústikqazaqstandyq Nazgúl Maratova ekinshi, almatylyq Aqerke Ramazanova men qyzylordalyq Nurǵanym Turshabek úshinshi orynǵa kóterildi.
Erler arasynda 100 kg salmaqta qaraǵandylyq Islam Bozbaev top jardy. Buǵan deiin 90 kg salmaqta tatamige shyǵyp júrgen ulttyq qurama múshesi finalda qyzylordalyq Aibek Serikbaevtan ailasyn asyrdy. Atyraýlyq Arman Qaliev pen pavlodarlyq Serik Sálmenov qola medaldi qanaǵat tutty.
Asa aýyr salmaqta (+100 kg) finalda shyǵysqazaqstandyqtar Ádil Orazbaev pen Erasyl Qajybaev bas júldeni sarapqa saldy. Ádil jarys favoriti sanalǵan Erasyldy ipponmen utyp, chempiondyq ataqty jeńip aldy. Jambyldyq Ǵalymjan Qyryqbai men qyzylordalyq Elaman Erǵaliev qola júldege qol jetkizdi.
Osylaisha Aqtaýda tórt kúnge sozylǵan el birinshiligi támamdalyp, barlyq salmaqta jeńimpaz-júldegerler anyqtaldy.
