Aqtaýda 15 jasar qyzdy er adamnyń zorlaǵany týraly aqparat áleýmettik jelide tarap ketken bolatyn. Osy áreketke barǵan jigitti aqtaýlyqtar úiiniń aldynan kútip alyp, kúsh kórsetpek bolǵan, dep habarlaidy "Ult aqparat".
Oblystyq politsiia departamenti baspasóz qyzmetiniń habarlaýynsha, Aqtaý qalasy politsiia basqarmasyna 5-shaǵynaýdandaǵy 4-úi janyna bir top adamnyń jinalǵany týraly shaqyrtý kelip túsken.
«Shaqyrtýǵa Aqtaý qalasy patrýldik politsiia batalony bardy. Anyqtalǵan tulǵalar jaǵdaidyń mán-jaiyn anyqtaý úshin Aqtaý qalasy politsiia basqarmasyna jetkizildi. Oblys turǵyndaryna úsh adamnan artyq top bolyp jinalýǵa tyiym salynatynyn eskertemiz» delingen habarlamada.
Joǵaryda atap ótkendei, áleýmettik jelide 15 jasar qyzdy karate-do bapkeriniń májbúrlep zorlap kelgeni týraly aqparat taraǵan bolatyn. Jeli belsendileri bólisip, kúdiktige ádil jaza qoldaný kerektigin suraǵan bolatyn. Osyǵan qatysty politsiia departamenti basshysynyń orynbasary Amangeldi Dosjanov málimdeme jasady.
«11 mamyr kúni WhatsApp messenjerinde jábirlenýshi jáne qylmys jasaǵan kúdikti týraly anyq-qanyǵy belgisiz málimetter tarap ketti. Al 12 mamyrda aimaqtyq politsiia departamenti QR Qylmystyq Kodeksiniń 147-baby 5-bóligimen tergep-tekserýdi bastady. Zańnyń osy babymen jeke ómirge qol suǵý boiynsha is qozǵalǵan. Ózderińizge málim, áleýmettik jelide kámeletke tolmaǵan qyz balany zorlaý týraly jalǵan málimet tarap jatyr. Bul derek boiynsha da sotqa deiingi tergeý bastaldy. Ol úshin zańmen 7 jylǵa deiin bas bostandyǵynan aiyrý jazasy kózdelgen. Jalǵan aqparat taratqan tulǵany anyqtaýǵa baǵyttalǵan jedel-izdestirý jumystary júrgizilip jatyr. Atalǵan qylmystyq is departament basshylyǵynyń baqylaýynda. Ózge de aqparat QR Qylmystyq-protsestik kodeksiniń 201-babyna sáikes tergeý aiaqtalǵansha jariialanbaidy», - deidi oblystyq politsiia departamenti basshysynyń orynbasary Amangeldi Dosjanov.
Amangeldi Asqarulynyń aitýynsha, osy aqparattan soń áleýmettik jelilerde zańsyz narazylyq aktsiiasyn ótkizýge shaqyrýlar taratylǵan.
«Keshe, iaǵni 12 mamyrda 5-shaǵynaýdan №4-shi úi janyna bir top jas áleýmettik jeliden estip-bilgen qylmys dereginiń mán-jaiyn anyqtaý úshin jinalyp, ózderiniń azamattyq ustanymyn bildirgisi kelgen. Budan soń barlyǵy da úiine jiberildi. Osy oraida turǵyndardy jalǵan aqparatqa senbeýge jáne qoǵamdyq tártipti buzýǵa baǵyttalǵan arandatý áreketterine boi aldyrmaýyn suraimyz» - deidi A.Dosjanov.
Aita keteiik, elimizde ulttyq arazdyqty qozdyrý jáne kórineý jalǵan aqparat taratýǵa zańmen tyiym salynǵan.
