Kaspii qubyr konsortsiýmyndaǵy aqaý biýdjet túsimine keri áser etpeidi. QR Energetika ministri Bolat Aqsholaqov Atameken Business telearnasyna bergen suhbatynda osyndai pikir bildirdi, dep habarlaidy QazAqparat.
Telearnaǵa bergen onlain suhbatynda Energetika ministri Kaspii qubyr konsortsiýmyndaǵy aqaýdy joiýǵa 1,5-2 aidan artyq ýaqyt ketpeidi degen boljam aitady.
«Eksporttyń bir bóligi obektivti negizde qysqarady... Biraq sonshalyqty iri kólemde emes... Sarapshylardyń nazaryn myna jaitqa aýdarǵym keledi. Qazaqstannyń kez kelgen munai kenishinde josparly jóndeý jumystary bolyp turady. Aitalyq, Teńiz ben Qashaǵan, Qarashyǵanaq jáne ózge de kenishterde mundai jóndeýler 40-50 kúnge sozylýy múmkin. Sol sebepti «Kaspii qubyr jelisi konsortsiýmynyń» infraqurylymyn jóndeýge qajet delingen 1-1,5 ai Qazaqstan úshin sonshalyqty dárejede qaýipti emes. Ónim kólemi azaiady, biraq tehnologiialyq turǵyda oǵan jol berýge bolady dep topshylai alamyz», - dedi Bolat Aqsholaqov.
Vedomstvo basshysy bul aqaýdyń biýdjet josparyna keri áseri bolmaitynyna sendirdi.
«Shynyn aitsaq, eksporttyń belgili bir bólshegi qysqarady. Búkil balama joldardy eskergenniń ózinde qysqarý bolady. Biraq onyń áseri shetin bolady dep aitýǵa kelmeidi. Árine munai óndirý qysqarady. Biýdjetke jáne aqshalai túsimderi týraly aitsaq, qazir baǵa aitarlyqtai joǵary. Tipti óte joǵary deýime bolady. Búgin tańerteń bir barreli 120 dollardan joǵary boldy. Al biz biylǵy jyldyń biýdjetin 60 dollarmen josparlaǵanbyz. Sondyqtan túsimder boiynsha táýekel kórip turǵan joqpyn. Sarapshylardyń aityp otyrǵany jyldyq kólemmen eseptelgen. Jyl boiy qubyr jumys istemese, árine túsim de qysqaratyn edi. Biraq eshkim ondai uzaq merzimge sozylady dep topshylap otyrǵan joq. Qubyrdy jóndeý jumystaryn tehnikalyq turǵyda oryndaýǵa bolady. Sonshalyq bir kúrdeli qondyrǵy emes. Qazir tek jeldiń kesirinen tankerdi jaqyndatý múmkin bolmai jatyr. Shlangalardy aýystyrý úshin qubyrdaǵy munaidy basqa jerge quiyp alý kerek. Al ol úshin tanker qajet. Másele osynda ǵana», - dedi Bolat Aqsholaqov.
