Senator Dana Nurjigit halyqtyń qarjylyq saýattylyǵyn kótermei, kredit berýge bolmaityn aitty, dep habarlaidy Sputnik Qazaqstan.
Senattyń búgingi otyrysynda depýtat aýyl sharýashylyǵy salasynda kredit berý máselesine toqtaldy. Osy oraida Nurjigit jaqynda "Damý" qorynda jumys isteitin jýrnalist áriptesimen kezdesip, sóileskenin jetkizdi. Ol kisi "Damý" qoryna túsetin suraqtarmen ainalysady. Sóitip, tikelei halyqpen jumyn isteidi. Osy mamannyń sózine qaraǵanda, halyqtyń qarjylyq saýattylyǵy óte tómen. Al suraqtardyń basym bóligi jeke bastyń sharýasynan aspai jatady.
"Tek "Men nesie ala alamyn ba?", "Men osyǵan deiingi nesielerdi sizder arqyly jaba alamyn ba?" degen siiaqty suraqtardyń aiasynan shyqpaidy eken. Sosyn "Órleý", "Bastaý" siiaqty baǵdarlamalar boiynsha qarjy aldym, biznes bastaityn boldym dep aqshany alady, al keiin úiine jóndeý jumystaryn júrgizip, ia bolmasa, qudaiy berip, quda shaqyryp, sondai óziniń jeke basynyń sharýalaryna aqshany jumsap jiberedi eken. "Al úkimetke qandai esep beresiń? Qalai esep beresiń? "dese, kórshiniń buzaýyn ákelip, kórsete salamyn dep, aqshany dalaǵa shashqan bolyp shyǵady. ", - deidi Nurjigit.
Depýtattyń oiynsha, halyqtyń qarjylyq saýattylyǵyn kótermei, aqshany bólýdiń qajeti joq.
"Qarjylyq saýattylyqty kótermei, aýyl sharýashylyǵyndaǵy biznes bastaý jobalaryn jiti baqylamai, naqty suraqtardy qoia biletin adamdar aldyna kelmei, aqshany bólýdiń qajeti joq dep oilaimyn. Mine, osyǵan jiti nazar aýdarylsa eken deimin", - dep atap kórsetti Nurjigit.
