Asa iri kólemde qarajat jymqyrdy dep aiyptalyp otyrǵan Qazaqstannyń Ózbekstandaǵy elshisi Erik Ótembaev áli de syrtqy ister ministrliginiń qyzmetkeri. Bul týraly búgin syrtqy saiasi vedomstvo baspasóz qyzmetiniń jetekshisi Aibek Smadiiarov málimdedi, dep habarlaidy Sputnik Qazaqstan tilshisi.
Onyń aitýynsha, qazaqstandyq diplomat qyzmetinen tek ýaqytsha shettetilgen. Qazir kúdikti Astanada.
"Qazaqstannyń barlyq tótenshe jáne ókiletti elshisi Prezident jarlyǵymen ǵanabosatylady. Qazir tergeý júrip jatyr. Tergeý múddesine sáikes istiń egjei-tegjeiin aita almaimyn", — dedi Smadiiarov.
Qazaqstannyń Ózbekstandaǵy elshisi mindetin ýaqytsha elshiliktiń keńesshi-ýákili atqaryp jatyr.
Eske sala ketsek, byltyr qazan aiynda memlekettik qyzmet isteri jáne sybailas jemqorlyqqa qarsy is-qimyl agenttigi qazaqstandyq diplomat Erik Ótembaevtyń asa iri kólemde biýdjet qarjysyn jymqyrdy degen kúdikke ilingenin habarlady.
Tashkentte elshi qyzmetin atqarǵan 52 jastaǵy diplomat Qazaqstannyń Ózbekstandaǵy elshiligi ákimshilik ǵimaratynyń qurylysy boiynsha atqarylǵan jumystardyń jalǵan aktilerine qol qoiǵany anyqtaldy. Onyń zańǵa qaishy áreketi saldarynan memleket biýdjetine 140 million teńge (400 myń dollardai) shyǵyn kelgen.
