Foto: © Sputnik / Vladislav Vodnev
Energetika ministri Almasadam Sátqaliev MAEK-tegi apattyń sebebin túsindirdi, dep habarlaidy Sputnik Qazaqstan.
Mańǵystaý oblysynda Mańǵystaý atom energetika kombinatynda eki energoblok isten shyqty. Sonyń saldarynan óńirde energiiany tutynýǵa ishinara shekteý engizildi. Munai óndirý kólemi tómendedi.
Energetika ministriniń aitýynsha, mamandar 1-shi energetikalyq blokty jóndep jatqanda 3-shi bloktaǵy aqaýdy baiqaǵan.
"MAEK-tegi 1-shi blokta apat bolǵanyn bilesizder. Sebebi týrbinasy durys istemei qaldy. Biz osy blokty jóndegende 3-shi blokta sýdyń tym kóp ótip jatqanyn baiqadyq. Basynda 40 tonna, odan keiin 60 tonna sý ketti. Bul degenimiz, qazandyqtardyń qalqandaryna zaqym tigen. Osyǵan bailanysty 3-shi blokty da jóndeýge týra keldi. Generatsiiany da aitarlyqtai azaitýǵa májbúr boldyq. Ol jaqta qondyrǵylar tozǵan, ony jańartýǵa aqsha jetpei jatyr", - dedi Sátqaliev jýrnalisterge bergen suhbatynda.
Onyń sózine qaraǵanda, oblysta energiia tutyný kólemi 650 MVt quraidy. Al apattan keiin 250 MVt-qa shekteý engizýge týra keldi.
"Aldymen munai-gaz salasyndaǵy kásiporyndar úshin, sondai-aq basqa da óndirister úshin shekteýler engizildi. Shamamen eki saǵatqa sóndirip turýǵa týra keldi", - dep atap ótti Sátqaliev.
Qazirgi kezde memlekettik komissiia óz jumysyna kiristi. Memlekettik energetikalyq qadaǵalaý basshylary da sol jaqta júr.
