AQSh-ta Viskonsin shtatynyń Kenosha qalasynda politseidiń afroamerikalyq azamatty atqany týraly video jariialanǵannan keiin narazylyq tutanyp, shtat gýbernatory aýmaqta tótenshe jaǵdai jariialaýǵa májbúr boldy. Birneshe kúnnen beri qalada túnde tártipsizdikter bolyp jatyr.
Atystyń jai-japsary ázirge belgisiz. Birneshe jerden oq tigen 29 jastaǵy Djeikob Bleiktiń jaǵdaiy aýyr. Bul týraly onyń otbasy men advokattary habarlady.
Viskonsin shtatynyń gýbernatory Toni Evers tótenshe jaǵdai jariialap, shamamen 100 myń turǵyny bar qalaǵa ulttyq gvardiia jasaqtaryn jibergen.
25 tamyz kúngi baspasóz máslihaty kezinde Bleiktiń ata-anasy oqiǵaǵa ókinish bildirip, eki kún boiy qalada bolǵan vandalizm, órteý, tonaýdy aiyptaǵan. Sonyń kesirinen ondaǵan ǵimarat búlingen.
"Olar ulymdy jeti ret atty. Jeti ret. Onyń ómiriniń quny joq siiaqty. Ulymnyń quny bar. Ol – adam, quny bar" dedi jýrnalisterge Bleiktiń ákesi.
Bleiktiń sheshesi Djýliia Djekson ulynyń "hál ústinde jatqanyn" aityp, qaladaǵy kúsh qoldanýdy aiyptaǵan.
AQSh-ta politsiianyń qara násildi turǵyndarǵa negizsiz oq atýy jii kezdesedi. Úsh ai buryn Minneapoliste 46 qara násildi turǵyn Djordj Floid politsiia qolynan qaza tapqannan keiin AQSh-ta júzdegen qalasynda násilshildikke qarsy narazylyq aktsiialary ótti. Sherý aýqymy keńeiip, AQSh prezidenti sherýshilerge qarsy ásker kúshin qoldanýdy qarastyrdy. Narazylar politsiia qyzmetkerleri qara násildileri negizsiz alalaidy dep sanaidy. Mundai oqiǵalar munyń aldynda da bolǵan.
2013 jyly osyǵan uqsas jaǵdaida 28 jastaǵy politsei Djordj Zimmerman qolynda qarýy joq 17 jastaǵy qara násildi Treivon Martindi atyp óltirip, sot Zimmermandy kinásiz dep tapqannan keiin AQSh-ta Black Lives Matter (Qaralardyń ómiri qundy) degen qozǵalys paida boldy.
