AQSh koronavirýs juqtyrǵandar sany boiynsha álemde birinshi orynǵa shyqty. Worldometer saitynyń dereginshe, 26 naýryzda AQSh-ta naýqastar sany 82 myńnan asqan. Epidemiia bastalǵan ýaqyttan beri munda 1177 adam koronavirýstan qaitys bolǵan (Qytaida - 3287 adam). Beisenbi kúni bir kúnde 10 myńnan astam adamǵa virýs juqqany belgili boldy. 24 saǵat ishinde 150 adam kóz jumǵan.
AQSh prezidenti Donald Tramptyń aitýynsha, eldiń koronavirýs juqtyrý oqiǵalary boiynsha birinshi orynǵa shyǵýy adamdarǵa testileýdiń jappai ótkizilýimen bailanysty. Indet juqtyrý oqiǵalary Amerikanyń barlyq 50 shtatynda tirkelgen
Ásirese Niý-Iorkte jaǵdai aýyr. Munda 37 myńnan astam adamǵa virýs juqqan. Budan nashar statistika tek Italiiada ǵana.
Niý-Iork gýbernatory Endriý Kýomo virýs juqtyrǵandar sany kóp bolǵandyqtan aýrýhanalar, meditsinalyq mekemeler tolyp ketýi múmkin dep málimdedi. Jaǵdaiy aýyr naýqastarǵa qoldanylatyn ókpeni jasandy túrde jeldetetin apparat jetpei qalýy yqtimal. Niý-Iork jáne AQSh-tyń ózge shtattarynda karantin jariialandy.
Kongrestiń ókilder palatasy 27 naýryzda pandemiia jaǵdaiynda ekonomika men azamattardy qoldaý týraly zań jobasyn maquldaidy. Paket quny 2 trln dollar dep aitylady.
AQSh-ta koronavirýs indeti órshigennen keiin jumyssyz adamdardyń sany artyp, rekordty 3,3 millionǵa jetti.
Ótken jyldyń sońynda Qytaida alǵash ret tirkelgeli beri álemde koronavirýs juqtyrǵandar jarty millionǵa jýyqtap qaldy. AQSh-taǵy Djon Hopkins ýniversitetiniń dereginshe, 27 naýryzda álemde virýs juqtyrǵandar 530 myńnan asty. 24 myńnan asa adam qaza bolyp, 120 myńnan astam naýqas dertten aiyqty. Dúniejúzilik densaýlyq saqtaý uiymy Covid-19 koronavirýsyn "pandemiia" dep jariialaǵan.
