AQSh Kongresi aldynda sóilep jatqan Ýkraina prezidenti Vladimir Zelenskii. Ol Kievten videobailanys arqyly qosyldy. 16 naýryz 2022 jyl.
AQSh prezidenti Djo Baiden Ýkrainaǵa qosymsha qarý-jaraq jiberetinin málimdedi.
Aqparatqa qaraǵanda, Vashington Kievke áýe qorǵanysyn qamtamasyz etetin Stinger zenit-zymyran júiesiniń 800 danasyn, 2 myń Javelin, tankilerge qarsy 7 myń tehnika, 100 áskeri dron, 100 granata atqysh, 5 myń vintovka, 400 pýlemet jáne ózge de qarý-jaraq túrlerin jiberedi.
"Bul uzaq ári kúrdeli shaiqas bolýy múmkin. Biraq Amerika Pýtinniń beibit halyqqa jasaǵan ádiletsiz shabýylyna ushyraǵan Ýkraina halqyn qoldaidy" dedi Baiden.
Onyń sózine qaraǵanda, munyń bári - AQSh-tyń Ýkrainaǵa sońǵy úlgidegi qarý-jaraq jiberý nietinen ainymaityndyǵynyń dáleli.
"Muny biz ǵana jasap otyrǵan joqpyz. Bizdiń odaqtastar men áriptester Ýkrainaǵa qaýipsizdik salasynda qol ushyn berip jatyr. Biz ári qarai da tasymaldai beremiz" dedi Baiden.
16 naýryzda sál erterek Ýkraina basshysy Vladimir Zelenskii AQSh Kongresiniń qos palatasynda videomálimdeme jasaǵan. Onyń aitýynsha, Kiev Resei áskeriniń shabýylynan kóz ashpai keledi. Biraq ýkrain halqy berilmeidi jáne qasyq qany qalǵansha kúresedi. Zelenskiidiń aitýynsha, ýkrainalyqtar Resei basqynshylyǵyna 24 aqpan emes, 2014 jyly Máskeý Qyrymdy anneksiialap alǵan kezeńnen beri tótep berip jatyr.
BUU Halyqaralyq soty 16 naýryzda Resei Ýkrainadaǵy soǵysty dereý toqtatýy tiis degen sheshim shyǵarǵan. Sot sonymen birge Resei men Kiev jaǵdaidy ýshyqtyryp jiberýi múmkin qadamdardan qashýy tiis degen.
