AQSh Ýkraina úkimetine biýdjet qyzmetkerleriniń jalaqysyn, aýrýhanalar men mektepterdiń elektr qýaty men otyn-sýyn tóleý úshin qosymsha $4,5 milliard dollar beretin boldy. Bul jóninde AQSh-tyń halyqaralyq damý jónindegi agenttigi saitynda aitylǵan, dep habarlaidy Azattyq.
AQSh qarjy ministrligi aqshany Dúniejúzilik bank arqyly Ýkrainaǵa bólek-bólek transhtarmen bermek. Tamyz aiynda 3 milliard dollar jiberedi.
Amerikanyń aqshasy Ýkraina úkimetiniń halyq aldyndaǵy áleýmettik mindettemelerin oryndaýǵa kómektesedi.
"Ýkrainadaǵy soǵys altynshy aiǵa ulasyp barady. Milliondaǵan ýkrain úiin tastap ketýge májbúr boldy. Ýkraina biligi qysta gaz tapshylyǵy bolýy múmkin dep eskertip otyr", — deidi "Amerika daýysy". Dúniejúzilik bank baǵasyna qaraǵanda, soǵys saldarynan Ýkrainada kedeishilik kúsheie túsedi.
Buǵan deiin AQSh Ýkraina biýdjetine shilde aiynda $1,7 milliard, maýsym aiynda $1,3 milliard dollar bergen. Vashington munan ózge áskeri kómekke milliardtaǵan dollar bólgen.
Dúisenbide AQSh qorǵanys ministri Ýkrainaǵa quny bir milliard dollarǵa baǵalanatyn qarý-jaraq beretinin málimdegen.
Bul kómektiń ishinde dúrkindetip atatyn HIMARS zymyran kesheni men áýe qorǵanysyna arnalǵan NASAMS kesheni, artilleriianyń 155 kalibrdegi 75 myń snariady men berendi 50 meditsinalyq avtomobil, jaiaý áskerge qarsy minalar men jarylǵyshtar, minomiot júieleri men tankige qarsy granatomiotter bar.
Ýkraina biliginiń baǵasyna qaraǵanda, soǵys shyǵyndary men salyq túsimderiniń azaiýyna bailanysty Ýkraina biýdjetinde aiyna $5 milliard dollar kóleminde tapshylyq bolyp jatyr.
