اقش ۋكراينا ٷكٸمەتٸنە بيۋدجەت قىزمەتكەرلەرٸنٸڭ جالاقىسىن, اۋرۋحانالار مەن مەكتەپتەردٸڭ ەلەكتر قۋاتى مەن وتىن-سۋىن تٶلەۋ ٷشٸن قوسىمشا $4,5 ميلليارد دوللار بەرەتٸن بولدى. بۇل جٶنٸندە اقش-تىڭ حالىقارالىق دامۋ جٶنٸندەگٸ اگەنتتٸگٸ سايتىندا ايتىلعان, دەپ حابارلايدى ازاتتىق.
اقش قارجى مينيسترلٸگٸ اقشانى دٷنيەجٷزٸلٸك بانك ارقىلى ۋكرايناعا بٶلەك-بٶلەك ترانشتارمەن بەرمەك. تامىز ايىندا 3 ميلليارد دوللار جٸبەرەدٸ.
امەريكانىڭ اقشاسى ۋكراينا ٷكٸمەتٸنٸڭ حالىق الدىنداعى ەلەۋمەتتٸك مٸندەتتەمەلەرٸن ورىنداۋعا كٶمەكتەسەدٸ.
"ۋكرايناداعى سوعىس التىنشى ايعا ۇلاسىپ بارادى. ميلليونداعان ۋكراين ٷيٸن تاستاپ كەتۋگە مەجبٷر بولدى. ۋكراينا بيلٸگٸ قىستا گاز تاپشىلىعى بولۋى مٷمكٸن دەپ ەسكەرتٸپ وتىر", — دەيدٸ "امەريكا داۋىسى". دٷنيەجٷزٸلٸك بانك باعاسىنا قاراعاندا, سوعىس سالدارىنان ۋكراينادا كەدەيشٸلٸك كٷشەيە تٷسەدٸ.
بۇعان دەيٸن اقش ۋكراينا بيۋدجەتٸنە شٸلدە ايىندا $1,7 ميلليارد, ماۋسىم ايىندا $1,3 ميلليارد دوللار بەرگەن. ۆاشينگتون مۇنان ٶزگە ەسكەري كٶمەككە ميللياردتاعان دوللار بٶلگەن.
دٷيسەنبٸدە اقش قورعانىس مينيسترٸ ۋكرايناعا قۇنى بٸر ميلليارد دوللارعا باعالاناتىن قارۋ-جاراق بەرەتٸنٸن مەلٸمدەگەن.
بۇل كٶمەكتٸڭ ٸشٸندە دٷركٸندەتٸپ اتاتىن HIMARS زىمىران كەشەنٸ مەن ەۋە قورعانىسىنا ارنالعان NASAMS كەشەنٸ, ارتيللەرييانىڭ 155 كاليبردەگٸ 75 مىڭ سناريادى مەن بەرەندٸ 50 مەديتسينالىق اۆتوموبيل, جاياۋ ەسكەرگە قارسى مينالار مەن جارىلعىشتار, مينوميوت جٷيەلەرٸ مەن تانكٸگە قارسى گراناتوميوتتەر بار.
ۋكراينا بيلٸگٸنٸڭ باعاسىنا قاراعاندا, سوعىس شىعىندارى مەن سالىق تٷسٸمدەرٸنٸڭ ازايۋىنا بايلانىستى ۋكراينا بيۋدجەتٸندە ايىنا $5 ميلليارد دوللار كٶلەمٸندە تاپشىلىق بولىپ جاتىر.
