Býdapeshtte ótip jatqan sý sporty túrlerinen álem chempionaty kezinde AQSh quramasynyń kórkem júzýshisi basseinde esinen tanyp qaldy. Ony jattyqtyrýshysy qutqardy, dep habarlaidy QazAqparat agenttigi NBC News basylymyna silteme jasap.
Eki dúrkin Olimpiada chempiony, 25 jastaǵy Anita Alvares erkin baǵdarlamasyn aiaqtaǵannan keiin kenetten esinen tanyp, basseinniń túbine ketti. Buǵan deiin Ispaniia komandasynyń quramynda sinhrondy júzýden Olimpiadada tórt ret júlde alǵan AQSh quramasynyń jattyqtyrýshysy Andrea Fýentes sportshyny qutqarý úshin sýǵa sekirdi. Ol Alvaresti basseinnen alyp shyqty.
Anitaǵa dereý alǵashqy meditsinalyq kómek kórsetildi. Fýentestiń aitýynsha, Alvarestiń densaýlyǵyna qaýip tónip turǵan joq. Dárigerler onyń júrek soǵý jiiligin, ottegi men qant deńgeiin, qan qysymyn jáne basqa da mańyzdy kórsetkishterin teksergen.
Fýentes Ispaniianyń «Marca» gazetine bergen suhbatynda sporttyq shara qutqarýshylarynyń eshqaisysy áreket etpegendikten, sýǵa sekirgenin aitady.
Anita Alvares alty kún ishinde tórt aldyn ala jáne úsh finaldyq baiqaýda tamasha óner kórsetti. Ol jeke finaldy jetinshi bolyp aiaqtady.
