AQSh tálipter jańadan qurǵan Kabýldaǵy aýǵan úkimetine "ýaqytsha kabinet" degen baǵa berdi, dep habarlaidy Azattyq.
"Kez kelgen ákimshilik ókili, prezident, ulttyq qaýipsizdik qyzmetiniń kez kelgen mamany tálipter sózge toqtap, halyqaralyq qaýymdastyq múshelerin qurmetteidi dep aita almas edi. Olar ázirge buǵan sendire alǵan joq" dedi Djo Baiden ákimshiliginiń ustanymy jóninde aitqan Aq úidiń baspasóz hatshysy Djen Psaki.
Sársenbi kúni AQSh memlekettik hatshysy Entoni Blinken Germaniia jáne ózge 20 el ókilimen onlain kezdesýden soń Aýǵanstannyń jańa úkimetine "isine qarap baǵa beriledi", legitimdilik jóninde aitý "áli erte" dep málimdedi.
8 qyrkúiekte Germaniiadaǵy amerikalyq Ramshtain áýe bazasyna kelgennen keiin Blinken sol jaqta Germaniia syrtqy ister ministri Haiko Maaspen kezdesken. Bul nysan Aýǵanstanda "Taliban" (qozǵalys Qazaqstan men ózge elderde terroristik uiym dep tanylyp, qyzmetine tyiym salynǵan) bilikti basyp alǵannan keiin sol jaqtan evakýatsiialanǵan myńdaǵan adamdy qabyldaityn pýnkt retinde paidalanyldy.
"Tálipter halyqaralyq qaýymdastyqtyń ózderin moiyndaǵanyn kútip otyr, biraq kez kelgen moiyndaý, kez kelgen qoldaý soǵan laiyq bolýdy talap etedi" dedi AQSh memlekettik hatshysy.
Tálipter Kabýl men Aýǵanstannyń barlyq-derlik provintsiiasyna tamyz ortasynda baqylaý ornatqan. Mamyrda AQSh bastaǵan halyqaralyq koalitsiia áskerin elden ákete bastaǵan kezde tálipter úkimet kúshterimen soǵysty údetip, aimaqtardy jaýlai bastaǵan.
Tálipter jańa úkimet quramyn 7 qyrkúiekte jariialady. Jańa úkimette birde-bir áiel joq jáne jetekshi oryndardyń barlyǵynda tálipter otyr. Olar eldi shariǵat zańdarymen qatań basqarýdy kózdep otyr. Úkimet quramynda BUU nemese AQSh-ta terrorist retinde tanylyp, izdeý jariialanǵan keminde eki adam bar.
Kabýldaǵy úkimet qulaǵannan keiin Aýǵanstannan qashqan prezident Ashraf Ǵani 8 qyrkúiekte málimdeme jasap, aýǵan azamattarynan úkimettiń qulaýyna jol bergeni úshin keshirim surady. Ol ózine qatysty aitylǵan "million dollary bar shabadanmen Aýǵanstannan qashty" degen tujyrymdy taǵy joqqa shyǵardy. Onyń aitýynsha, qaýipsizdik boiynsha keńesshileri qan tógilmes úshin oǵan elden ketýge keńes bergen.
