Demokrat Djo Baiden Michigan men Viskonsinde jeńiske jetip, alǵa ozdy. Biraq birneshe shtatta daýys áli sanalyp jatyr. Alǵashqy sailaý ýchaskeleri jabylǵannan beri 24 saǵat ótse de, AQSh-taǵy prezident sailaýynyń jeńimpazy anyqtalǵan joq.
Baiden Michiganda sailaýshylar alqasynyń - 16, Viskonsinde 10 daýysyna ie bolǵan. Osylaisha qazir Djo Baidende 253 daýys bolyp tur. Al Trampta 214 daýys bar. Jeńiske jetý úshin kandidat sailaýshylar alqasynyń keminde 270-iniń daýysyn alýy kerek.
Eger Baiden Arizona men Nevadada jeńse, sailaý jeńimpazy atanady. Sarapshylar Michigan men Viskonsindegi jeńis Baidenniń sailaýda jeńý múmkindigin arttyrdy dep otyr. 4 qarashada Michiganda ozǵany anyqtalǵannan keiin Baiden jeńiske jetetinin málimdedi.
Djordjiia men Pensilvaniiada da daýys sanaý jalǵasyp jatyr. Eki shtatta da Tramp alda keledi.
4 qarashada Tramp shtaby Michigan, Pensilvaniia jáne Djorjdiia shtattarynda daýys sanaýdy toqtatýdy talap etip, sotqa aryz túsirgen. Tramp shtaby atalǵan úsh shtatta biýlletenderdi esepteý kezinde ashyqtyq bolmaǵanyn alǵa tartqan. Degenmen sailaý kezinde qandai da bir zańbuzýshylyq bolǵany jaily aqparat joq.
