Foto: Andrew West/The News-Press/USA Today
Daýyl aldymen Floridaǵa jetip, keiin soltústikke qarai – Djordjiia, sondai-aq Soltústik jáne Ońtústik Karolinaǵa jyljydy, dep habarlaidy BBC.
AQSh-tyń ońtústik-shyǵysyn sharpyǵan «Helen» daýyly saldarynan keminde 43 adam qaza taýyp, milliondaǵan adam jaryqsyz qaldy.
Meteorologtar jel ekpini, qatty jańbyr men tornado qaýpi seiilmegenin eskertedi. Daýyl aimaǵyndaǵy úiler men joldardy jartylai sý basqan.
«Helen» daýyly – qýattylyǵy boiynsha ekinshi orynda turǵan, jel jyldamdyǵy saǵatyna 240 shaqyrymǵa jetetin 4-shi sanattaǵy daýyl. AQSh-tyń Daýyldardy baqylaý Ulttyq ortalyǵynyń málimetinshe, «Helen» 24 saǵat ishinde basylýy tiis, biraq qatty jel, sý tasqyny jáne kóshkin qaýpi saqtalady.
«Helen» Qurama Shtattarda daýyl qýattylyǵy reitinginde 14-shi orynǵa ie boldy. Bul rette onyń eni 675 km-ge jetedi jáne bul tarihtaǵy úshinshi kórsetkish – odan aýqymdy bolǵan alapat daýyldar 2017 jyly soqqan «Ida» jáne 1996 jyly soqqan «Opal».
Floridada jumadan beri kem degende segiz adam qaitys boldy. Djordjiia gýbernatory Braian Kemptiń habarlaýynsha, shtatta daýyl saldarynan kem degende 15 adam, onyń ishinde bir qutqarýshy qaza tapqan. Kemp qutqarý jumystaryna Ulttyq gvardiianyń 1000 múshesin jumyldyrýdy buiyrdy. Gýbernatordyń aitýynsha, shtatta 150-den astam jol jabyq, 1300 baǵdarsham isten shyqqan, keibir ǵimarattarda adamdar qalyp qoiǵan.
CBS News málimetinshe, Ońtústik Karolinada kem degende 17 adam qaza boldy. Soltústik Karolinada eki adam jáne Virdjiniiada bir adam qaza tapqany týraly habarlandy.
BAQ-tardyń jazýynsha, Tennessi shtatyna qarasty Ervin qalasynda 58 patsient pen qyzmetkerler aýrýhananyń shatyryna shyqty, aýa raiynyń qolaisyzdyǵyna bailanysty olardy bastapqyda qaiyqtarmen nemese tikushaqtarmen evakýatsiialaý múmkin bolmady. Keiin adamdardy politsiia men Ulttyq gvardiianyń tikushaqtary ǵimarat tóbesinen alyp ketti.
Saqtandyrý kompaniialary «Helen» keltirgen shyǵyndy milliardtaǵan dollarǵa baǵalady.
.jpg)