AQSh-ta alaiaqtyq jasady dep aiyptalǵan Qazaqstan azamattary boiynsha kelesi sot tyńdalymy 2019 jyldyń aqpan aiynda ótedi. Bul týraly QR SIM resmi ókili Aibek Smadiiarov brifingte málimdedi, dep habarlaidy QazAqparat tilshisi.
«Atalǵan is boiynsha alǵashqy sot jazda ótken bolatyn. Ekinshi sotqa keler bolsaq, tergeýshiler túrli elden kelgen 20-dan astam adam qatysqan bul iske qosymsha ýaqyt surady. Sol sebepti, kelesi sot tyńdalymy 2019 jyldyń aqpanyna belgilendi», - dep túsindirdi Aibek Smadiiarov.
Sonymen birge, ol Qazaqstannyń Niý-Iorktegi Bas konsýldyǵynyń kómegimen barlyq 3 azamatshanyń qamaýdan bosatylǵanyn atap ótti.
«Olardyń barlyǵy kepilmen bosatylǵan jáne qaladan shyqpaý týraly qolhat jazǵan», - dep óz sózin tolyqtyrdy Aibek Smadiiarov.
Aita keteiik, buǵan deiin sheteldik BAQ-ta Niý-Iork qalasynda 25 adamnan quralǵan qylmystyq toptyń ustalǵany jaiynda jazyldy. Iri alaiaqtyq áreketterge úsh Qazaqstan azamatynyń qatysqanyn QR Syrtqy ister ministrligi rastady.
Olar ǵalamtorda jalǵan xabarlandyrýlardy ornalastyryp, kólikterdi satqan. Alaida ýaqytsha firmalar arqyly aldyn ala tólem alǵannan keiin izderin jasyryp otyrǵan. Osylaisha, alaiaqtar 4,5 mln dollardy qoldy qylǵan. Niý-Iork shtatynyń zańnamasy boiynsha qylmyskerler 20-30 jylǵa deiin bas bostandyǵynan aiyrylýy múmkin.
