AQSh-ta 2016 jyly ótken prezident sailaýyna Reseidiń yqtimal kiligýin tergeitin prokýror Robert Miýller prezident Donald Trampty ulyqtaý saltanatyna ýkrainalyq saiasatkerler men biznesmenderdiń qatysqanyn teksere bastady. New York Times gazetiniń jazýynsha, prokýrorlar kýágerlerden Ýkraina azamattarynyń Trampty ulyqtaý saltanatyna qatysýǵa qalai shaqyrylǵany, AQSh-ta kimmen kezdesip, neni talqylaǵany týraly suraǵan.
Basylym dereginshe, 2017 jyly 20 qańtarda ótken Trampty ulyqtaýǵa ýkrainalyq ondaǵan saiasatker men biznesmen qatysqan. Prokýrorlar ulyqtaýǵa qatysqan ýkrainalyqtardyń birazy Máskeý múddesin qorǵap, Reseige salǵan sanktsiiany joidyrýǵa jumys istep júrgen bolýy múmkin dep boljaidy. New York Times málimetinshe, olardyń keibiri kongresstegi yqpaldy respýblikashyldarmen jáne Tramptyń jaqyn serikterimen kezdesýler uiymdastyrǵan.
Birer kún buryn CNN telearnasy óz derekkózine silteme jasap, ýkrainalyq oligarhtar Rinat Ahmetov pen Sergei Levochkinniń Tramptyń sailaýaldy shtabynyń burynǵy basshysy Pol Manaforttan AQSh-taǵy 2016 jylǵy sailaýaldy kampaniiasy kezinde áleýmettik saýalnama nátijelerin alǵan bolýy múmkin ekenin habarlaǵan. Saýalnama nátijelerin olarǵa Manaforttyń biznestegi seriktesi, Kremlge jaqyn adam sanalatyn Konstantin Kilimnik bergen. Kilimnikke syrtynan Reseidiń AQSh prezidenti sailaýyna kiligýi isi boiynsha aiyp taǵylǵan.
Arnaiy prokýror Robert Miýller bastaǵan komissiia Reseidiń AQSh-taǵy 2016 jyly ótken prezident sailaýyna yqtimal kiligýin bir jarym jyldan beri tekserip jatyr. Bul is boiynsha Tramp shtabynyń burynǵy birneshe qyzmetkeri endigi sottalyp ketti. Sonymen qatar Resei áskeri barlaýy men "trollder fabrikasy" dep atalyp ketken reseilik "Internetti zerttteý agenttiginiń" birneshe qyzmetkerine syrttai aiyp taǵylǵan. Ázirge kúdikti amerikalyqtardyń eshqaisysyna Reseimen astyrtyn sóz bailasý týraly aiyp taǵylǵan joq. Prezident Donald Tramp Miýllerdiń tergeýin "mystan aýlaý" naýqany dep synaidy. Máskeý AQSh-taǵy sailaýǵa kilikkenin joqqa shyǵarady.
