Sársenbi kúndiz Milýokide «Molson Coors» syra qainatý kompaniiasynyń qyzmetkeri jumys ýaqytynda bes áriptesin atqan. Beseýi de mert boldy, dep habarlaidy NBC resýrsy.
Milýoki politsiiasynyń málimetinshe, kompaniianyń ákimshilik ǵimaratynda qandy oqiǵadan keiin 51 jastaǵy azamat ózin atyp óltirgen. Atys kezinde ol kompaniianyń jumys kiiminde bolǵan.
Milýoki politsiiasynyń basshysy Alfonso Morales ǵimarattan bes qyzmetkerdiń denesi tabylǵanyn rastady. Atqan azamat pen marqumdardyń aty-jóni ázirge habarlanbaidy. Oqiǵa sebepteri anyqtalmady.
«Milýoki úshin bul – óte aýyr kún, men qaza tapqan kompaniia qyzmetkerleriniń otbasyna kóńil aitamyn», - dedi Morales jýrnalisterge. Ol sondai-aq atys kezinde ǵimaratta 1000-nan astam Molson Coors qyzmetkerleri bolǵanyn rastady.
Oqiǵadan keiin jasaǵan málimdemede «Molson Coors Beverage Co» kompaniiasynyń atqarýshy direktory Gevin Hattersli oq atqan adam Milýokidegi syra qainatý zaýytynyń qyzmetkeri ekenin atap ótti.
Jergilikti biliktiń aitýynsha, kásiporyndaǵy atys - 2004 jyldan bergi memlekettegi 11-shi jappai kisi óltirý qyrǵyny.
Molson 2016 jyly taǵy bir MillerCoors kompaniiasyn tolyǵymen satyp aldy jáne 2019 jyly kompaniianyń aty «Molson Coors Beverage Co» bolyp ózgerdi. Bul ózgeris korporativti qaita qurylymdaýdyń bóligi boldy, nátijesinde júzdegen jumys orny Denverden Milýoki qalasyna aýystyryldy, bul kompaniiaǵa shyǵyndy azaitýǵa múmkindik berdi.
Sársenbi kúni prezident Donald Tramp baspasóz konferentsiiasyn atys qurbandary men olardyń otbasyna kóńil aitýdan bastady, oq atqan adamdy«qaýipti kisi óltirýshi» dep atady.
