AQSh-tyń Boston qalasynda bolǵan terraktini tergeý barysynda sottalǵan qazaqstandyq Dias Qadyrbaev Almatyǵa ushyp keldi, dep habarlaidy QazAqparat tilshisi.
Alty jylǵa sottalǵan D. Qadyrbaev Amerika túrmesinen merziminen buryn bosap shyqty.
«2018 jyldyń 24 qazanynda bizdiń azamat Dias Qadyrbaev Almaty qalasyna ushyp keldi. Qazirgi tańda ol bostandyqta. Ol Amerikada jazasyn tolyǵymen ótep, Qazaqstanǵa qaityp keldi», - dedi QR Syrtqy ister ministrliginiń resmi ókili Aibek Smadiiarov vedomstvoda ótken brifingte.
Aibek Smadiiarov Qazaqstan Respýblikasynyń aýmaǵyndaǵy onyń jaýapkershiligi máselesin elimizdiń quqyqqorǵaý organynan surap bilý kerektigin atap ótti.
Eske sala ketsek, 2015 jyly qazaqstandyq stýdent Dias Qadyrbaev amerikalyq quqyqqorǵaý organdaryna 2013 jyly Bostonda jasalǵan lańkestikti tergeý barysyna kedergi jasaǵany úshin 6 jylǵa túrmege kesilgen bolatyn. Qadyrbaev teraktini jasaǵan Djohar Tsarnaevty tanityndyǵyn politsiiaǵa habarlamaǵan. Sonymen birge, jataqhanadaǵy Tsarnaevtyń bólmesin jinastyryp, tergeýge kedergi keltirgenin moiyndady.
Budan buryn QR Syrtqy ister ministrligi qazaqstandyq stýdent túrmeden bosap shyqqanyn jáne ol AQSh-tan Qazaqstanǵa jetkiziletinin rastaǵan edi.
Bostondaǵy lańkestik akti 2013 jylǵy 15 sáýirde jyl saiynǵy marafon kezinde boldy. Eki jarylys saldarynan úsh adam qaza taýyp, 260-tan astamy jaraqat aldy. Jarylysty jasady degen aiyp aǵaiyndy Tsarnaevtarǵa taǵyldy. Úlkeni - Tamerlan politseilermen atys kezinde óltirildi. Djohar arnaiy operatsiia kezinde tutqyndalyp, alqabiler soty ony ólim jazasyna kesti.
