AQSh prokýrorlary Niý-Iorkte júk kóligimen jaiaý adamdardy qaǵyp ótip, shabýyl jasady degen kúdikti, ózbekstandyq migrant Saifýllo Saipovqa terrorizmge qatysty qylmystar jasady degen aiyp taqty.
29 jastaǵy Saifýllo Saipov 1 qarashada Niý-Iorktiń Manhetten federaldyq sotyna múgedekter arbasymen, qol-aiaǵy kisendeýli kúide jetkizildi. Sotta oǵan "Islam memleketi" ekstremistik uiymyna materialdyq qoldaý kórsetti, zorlyq-zombylyq jasady jáne kólik quralyn qiratty degen aiyptar taǵyldy.
31 qazanda Niý-Iorktiń Manhetten aýdanynda júk kóligi velosiped jolaǵynda júrgen top adamdy qaǵyp, taptap ótken. Shabýyldan alty adam oqiǵa ornynda, eki adam aýrýhanaǵa áketip bara jatqan jolda qaza tapqan, jaralanǵan 12 adamnyń toǵyzy aýrýhanada jatyr.
Politsiia Saipovqa oq atyp, jaralap qolǵa túsirdi.
Prokýrorlar Saipov shabýyl jasaǵan kezde "óshpendilik pen burmalanǵan ideologiiany sińirgenin" málimdedi. Olardyń sózinshe, kúdikti shabýylǵa birneshe ai boiy daiyndalǵan.
Federaldyq tergeý biýrosy ózbekstandyq 32 jastaǵy Mýhammadzoir Kadirovty shabýylǵa qatysty kúdikti dep tanyǵanyn, ol týraly kez-kelgen aqparatty jinastyryp jatqanyn málimdedi.
1 qarashada AQSh prezidenti Donald Tramp shabýylǵa bailanysty immigranttardy tekserýdi kúsheitýge buiryq bergen. Tramp Kongrespen AQSh-ta turýǵa ruqsat beretin Green Card viza baǵdarlamasyn toqtatý jaiyn keńesip jatqanyn málimdedi. Kúdikti Saifýllo Saipov 2010 jyly AQSh-qa osy karta arqyly zańdy túrde barǵan.
Ol sonymen qatar quzyrly organdarǵa immigranttarǵa viza berýde olar týraly kóbirek málimet suratý, buryn qaida júrip-turǵany, qaida barǵany týraly derekterin bilýdi mindetteitin sharalardy júktedi.
