Maiami (Florida) aýmaǵyna kiretin Sýrfsaid qalasynda kópqabatty úi qulady. Jergilikti Local 10 telearnasynyń málimetinshe, júzge jýyq adamnyń taǵdyry belgisiz bolyp otyr, - dep habarlaidy Tengrinews.kz portaly RIA Novosti agenttigine silteme jasap.
Ǵimaratta 130 páterdiń jartysyna jýyǵy qiraǵan. Tótenshe jaǵdai ornyna 80-nen asa qutqarý toby jiberildi.
Maiami-Deid politsiiasynyń direktory Freddi Ramirestiń aitýynsha, politsiia 53 turǵynmen bailanys ornatqan, biraq taǵy 99 adam iz-túzsiz qalyp otyr. Assoshieited Press agenttigi bul aimaqta reseilik immigranttar men ortodoksiialyq evreilerdiń otbasy turatynyn atap ótti. Agenttik habaryna qaraǵanda, apat kezinde joǵalǵan 99 adamnyń 22-si Latyn Amerikasy elderinen.
Jergilikti BAQ-tyń keiingi málimeti boiynsha, úsh adam qaza taýyp, kem degende toǵyz adam jaralanǵan. Qazir 40-qa jýyq adam qutqarylǵany belgili.
Maiami-Deid okrýginiń meri Daniella Lavin Kava tótenshe jaǵdai týraly qaýlyǵa qol qoidy, ol qajetti federaldyq resýrstar alýǵa kómektesedi. Mer apat sebebin tekserýge injenerler jumylǵanyn aitty, ázirshe úi nege qulaǵany belgisiz.
