Foto: Dinara Idaialovanyń jeke muraǵatynan
Qazaq tildi kontenttiń sheteldegi úlesi kún sanap ósip keledi. Sonyń jarqyn mysaly – AQSh-ta turatyn jýrnalist jáne media-kásipker Dinara Idaialova, ol qazaq tilinde jańalyq taratatyn aqparattyq portal men radio arnasynyń negizin qalaǵan, dep habarlaidy Ult.kz.
Dinara – AQSh-taǵy «Qazaq Vibes» radiosynyń negizin qalaýshy jáne júrgizýshisi. Sonymen qatar ol Instagram jelisinde AQSh jańalyqtaryn qazaq tilinde usynatyn media-portaldy júrgizedi. Bul bastamalar – qazaq tilin, mádenietin jáne ulttyq bolmysty saqtaý maqsatynda jasalǵan mańyzdy qadamdar.
«Til – ulttyń jany»
Ol jasaǵan kontentterdiń 90% tek qazaq tilinde usynylady. Bul – Amerikaǵa qonys aýdarǵan qazaqtar úshin óte mańyzdy, óitkeni olar ana tilin umytpai, balalarymen qazaqsha sóilesip, mádeni bailanysyn úzbeýge tyrysady. Qazaq tilindegi jańalyqtar, mádeni baǵdarlamalar men bilim berý mazmuny – AQSh-taǵy qazaqtarǵa rýhani demeý bolýda.
«Amerikada júrgen qandastarymyzdyń kóbi aǵylshyn tilin tolyq meńgermegen. Sol sebepti, men AQSh jańalyqtaryn qarapaiym qazaq tilinde túsinikti etip jetkizýge tyrysamyn. Bul – olardyń elde bolyp jatqan oqiǵalardan habardar bolyp otyrýyna kómektesedi», – deidi ol.
“Qazaq Vibes – bul qazaq tilinde erkin sóileitin, álemde ne bolyp jatqanyn qazaqi kózqaraspen talqylaityn jańa keńistik,” — deidi avtor.
Áielderge arnalǵan sheberlik saǵaty – «Kameradan qoryqpa»
Dinara tek aqparat taratýmen ǵana shektelmeidi. Ol áielderge arnalǵan erekshe sheberlik saǵatyn uiymdastyrady – «Kameradan qoryqpa» dep atalatyn bul trening media salasynda óz oiyn erkin jetkizýge umtylǵan áielderge arnalǵan.
Bul bastama immigrant áielderge óz daýsyn tabýǵa, óz-ózine senimdi bolýǵa jáne kópshilik aldynda sóileý sheberligin meńgerýge múmkindik beredi. Trening barysynda qatysýshylar kamera aldynda sóileýdi úirenip, óz jobalaryn bastaýǵa motivatsiia alady.
AQSh-taǵy maqsat – mádeni kóptúrlilikke úles qosý
Dinara AQSh-taǵy jumysynyń maqsaty – tek kontent jasaý emes, sonymen qatar til men mádenietti saqtaý arqyly ulttyń rýhyn saqtaý, áielderdiń kóshbasshylyq qabiletin arttyrý jáne immigranttardy biriktirý.
«Meniń armanym – Amerikada da qazaq tili men mádenietin saqtap qalý. Bul jerde ósip kele jatqan jas urpaq úshin ana tiliniń qadirin túsindirý – úlken missiia», – deidi ol. Maqsat – qazaq tilin shetelde tiri ustaý ǵana emes, ony zamanaýi quraldar arqyly damytyp, kelesi urpaqqa jetkizý. Amerikada júrsem de, qazaq bolyp qalǵym keledi, ári basqalarǵa da osyny umytpaýǵa kómekteskim keledi», – deidi jýrnalist.
