Qurama Shtattar álemde koronavirýs juqtyrǵan naýqastardyń eń kóp sany tirkelgen birinshi elge ainaldy. Reuters agenttiginiń jeksenbi, 8 qarasha kúni jasaǵan esebine sáikes, pandemiia bastalǵan kezden beri qaýipti virýsty 10 millionnan astam adam juqtyrǵan. Bul týraly Reuters agenttigi habarlady.
Bul kúni álem boiynsha aýrý juqtyrǵandardyń jalpy sany 50 million adamnan asty.
Sońǵy on táýliktiń ishinde AQSh-ta aýrý juqtyrýdyń bir millionǵa jýyq oqiǵasy tirkelgen, bul 293 kún buryn Vashington shtatynda jańa koronavirýs infektsiiasy týraly alǵashqy habarlamanyń jariialaný sátinen bergi eń joǵary kórsetkish bolyp tabylady.
Ótken jeksenbide elde virýs juqtyrýdyń 131 420 jańa oqiǵasy tirkeldi. Reuters agenttiginiń esebi boiynsha, bul -koronavirýs infektsiiasynyń jetinshi kún qatarynan alty tańbaly ósim qarqynyn jalǵastyrýy.
Koronavirýs infektsiiasynan ólim oqiǵalarynyń jalpy sany 237 myńdy qurady.
Reuters esebi boiynsha, kún saiyn koronavirýstan tirkeletin 11 ólimniń ishinde bireýi AQSh-ta bolady. Osylaisha, sońǵy bes kúnde búkil el boiynsha ólim oqiǵalarynyń sany 1 myńnan asyp otyr.
Densaýlyq saqtaý sarapshylarynyń aitýynsha, aldaǵy tórt-alty aptanyń ishinde elde aýrý juqtyrý sanynyń kúrt ósýine bailanysty ólim oqiǵalary sanynyń artýy kútilip otyr.
Ótken senbide AQSh eliniń jańa sailanǵan prezidenti Djo Baiden jurtshylyq aldynda sóilegen sózinde koronavirýs infektsiiasymen kúresti aldyńǵy qatarǵa qoiatyndyǵyn atap ótken bolatyn.
