AQSh-ta áleýmettik teńsizdik pen násilshildikke qarsy jappai narazylyq sherýleri altynshy kún jalǵasyp jatyr. Birneshe qalada sherý tártipsizdikke ulasqan.
Narazylyq Minnesota shtaty Minneapolis qalasynyń afroamerikalyq turǵyny Djordj Floidtyń politsei qolynan qaza tabýynan keiin bastalǵan.
Tártipsizdikke bailanysty 40 qalada komendant saǵaty engizilgen. Biraq adamdar komendant saǵatyna bailanysty shekteýlerdi elemei jatyr. Niý-Iork, Chikago, Filadelfiia jáne Los-Anjeles qalalarynda turǵyndar men politsiia arasynda qaqtyǵys bolǵan. Politsiia jinalǵan jurtty taratý úshin kózdi ashytatyn gaz ben rezeńke oqtardy paidalanǵan. Birneshe qalada dúkenderdi tonaý, politsiia kóligin órteý faktileri tirkelgen.
AQSh biliginiń tótenshe jaǵdaida júginetin ulttyq gvardiiasy tártipti saqtaýǵa bes myń sarbazdy jumyldyrǵanyn aitty. Olar el astanasy Vashington qalasy men 15 shtatty óz qaraýyna alǵan. Narazylyq bildirýshiler kóshelerde ot jaǵyp, arnaiy jasaq qyzmetkerlerine tas laqtyryp jatyr.
Juma jáne senbi kúnderi AQSh prezidenti rezidentsiiasynyń aldynda shýly manifestatsiia ótken bolatyn. AQSh qupiia qyzmeti alty adamnyń tutqyndalǵanyn habarlaǵan. Narazylardyń kúzetpen qaqtyǵysýy da tirkelgen. Kei narazylar temir barerlerdi ysyryp tastaýǵa tyrysqan jáne qupiia qyzmettiń adamdaryna kirpish, tas, bótelke jáne ózge de zattar laqtyrǵan.
Sonymen qatar juma kúni el prezidenti Donald Tramp áieli jáne ulymen birge qysqa ýaqytqa Aq úi astyndaǵy jerasty býnkerge tyǵylǵan.
Narazylar Floidty tutqyndaýǵa qatysqan tórt politseidiń barlyǵyn jaýapqa tartýdy talap etip jatyr.
25 mamyr kúni Minneapolis politsiiasy 46 jastaǵy Floidty jalǵan aqsha qoldandy degen kúdikpen tutqyndamaq bolǵan. Qolyna kisen salyp, jerge jatqyzylǵan soń Derek Shovin deitin politsei bar salmaǵymen Floidtyń tamaǵyna tizelep otyryp, onyń aýa jetpei jatqany týraly shaǵymyn eleýsiz qaldyrǵan. Jaǵdaiy nasharlaǵan Floid aýrýhanaǵa jetkizilip, reanimatsiiada kóz jumǵan. Oqiǵa ornynda túsirilgen video áleýmettik jelide jyldam tarap, politsei áreketi násilshildik dep baǵalanyp, halyq ashýyn týdyrdy.
Qaza tapqan Floid qara násildi bolsa, ony tutqyndamaq bolǵan tórt politsei aq násildi bolǵan.
Floidty tutqyndaǵan tórt politsei qyzmettik tergeý aiaqtalǵansha jumystan bosatylǵan. Al Shovin qamaýǵa alynǵan. Oǵan abaisyzda kisi óltirdi degen aiyp taǵylyp otyr.
Bir kún buryn AQSh prezidenti Twitter-de músheleri tártipsizdikke qatysy bar dep aiyptalǵan “Antifa” ýltrasolshyl qozǵalysy terroristik uiymdar tizimine kirgiziledi dedi.
