AQSh-tyń Minnesota shtatynda 46 jastaǵy afroamerikalyq azamat Djordj Floidtyń óliminen keiin juma kúni birneshe qalada narazylyq aktsiiasy ótip, narazylar kólikter men dúkenderdi órtep, jergilikti politsiia ǵimaratyna órt qoidy. Ázirge tolyq emes aqparat boiynsha, eshkim zardap shekpegen. Qazir Minneapolis kóshelerin politsiia qyzmetkerlerinen bólek ulttyq gvardiia saqshylary baqylap tur. Narazylyq sharalary juma kúni AQSh-tyń ózge qalalaryna taraǵan. Olardyń arasynda Atlanta, Niý-Iork, San-Hose qalalary bar.
29 mamyrda Minnesotada Minneapolis turǵyny Djordj Floidyń ólimine tikelei qatysy bar dep aiyptalǵan burynǵy politsei Derek Shovin tutqyndaldy. Buǵan deiin politsiia qyzmetkeri Shovinniń Floidty tutqyndaý kezinde ony tizesimen basyp, tunshyqtyryp jatqany týraly video álemdik aqparat quraldaryna tarap ketken.
Kýágerler men áýecqoilar túsirgen videokadrdy saraptaǵan mamandardyń aitýynsha, Derek Shovin Djordj Floidtyń "demala almai jatyrmyn" degenine qaramastan moinyn qysyp ustap birneshe minýt bosatpaǵan.
Bastapqyda Floid aýrýhanada qaitys boldy dep aityldy, keiinirek aýrýhanaǵa bara jatqan kezde kóz jumǵany habarlandy. Ony jedel járdem kóligine kóterip jatqyzǵan kezde ólimaldy halde bolǵan. Dárigerlerdiń pikirinshe, onyń janynda bolǵan kez kelgen adam oǵan jyldam kómek berýi tiis bolǵan edi, alaida muny eshkim jasamaǵan.
Burynǵy vitse-prezident, AQSh prezidenttiginen úmitker Djo Baiden marqumnyń otbasyna kóńil aityp, jesirimen sóilesken.
Derek Shovinge "kúsh qoldaný arqyly kezdeisoq adam óltirý" baby boiynsha aiyp taǵyldy. Minnesota shtatynyń zańy boiynsha, bul bap boiynsha 25 jylǵa deiin bas bostandyǵynan aiyrý jazasy qarastyrylǵan. Oqiǵaǵa qatysy bar taǵy úsh politseidiń áreketi zerttelip jatyr.
Juma kúni tańerteń Minneapolistegi narazylyqtan habar taratqan CNN tilshilerin politsiia ustap, keiinirek bosatqan. Máselege Minnesota shtatynyń gýbernatory aralasyp, jýrnalisterdiń oqiǵadan habar taratýǵa quqyǵy bar ekenin aitqan.
AQSh prezidenti Donald Tramp qala basshylyǵyn jaǵdaidy baqylaýda ustai almady dep aiyptap, qalada tártip ornatý úshin ulttyq gvardiia men áskerdi jiberýi múmkin ekenin eskertken. Tramp buǵan deiin Floid otbasyna kóńil aityp, ádilet ministrliginen Floid ólimin zertteýdi jyldamdatýdy suraǵan.
