«Dońǵalaqtaǵy úidi» órtedi dep kúdiktelgen 9 jastaǵy balaǵa birinshi deńgeidegi adam óltirý aiyby taǵylyp otyr. Órt saldarynan úsh bala men eki eresek adam kóz jumǵan, dep habarlaidy AR News.
6 sáýir kúni bolǵan oqiǵanyń saldarynan bir jasar sábi men 2 jastaǵy eki bala jáne 34 jastaǵy er adam men 69 jastaǵy áiel adam kóz jumdy.
Qaiǵyly oqiǵa Chikagonyń ońtústik-batysyna qarai 240 shaqyrym jerdegi Gýdfild eldi mekenindegi Timberline mobildi úiler parkinde bolǵan.
Výdford okrýginiń tergeýshisi Tim Rýstman órt qasaqana qoiylǵanyn málim etti.
«Bul ońai sheshim bolǵan joq. Jap-jas balaǵa osyndai aýyr qylmys jasady degen aiyp taǵylyp otyr. Tergeý sońyna deiin júrýi kerek dep oilaimyn», - dedi okrýg prokýrory Greg Minger.
Mingerdiń aitýynsha, bala aiypty bop tanylǵan jaǵdaida shartty túrde bosatylyp, kem degende 5 jylǵa politsiianyń baqylaýyna alynady. Sondai-aq, terapiia seanstarynan ótýi yqtimal.
10 jasqa deiingi balalarǵa adam ólimine qatysty aiyp óte sirek taǵylatynymen, múldem bolmaidy degen sóz emes.
Ótken aida Michigan shtatynyń sýdiasy Sterdjistiń janyndaǵy úiinde anasyn atyp óltirdi dep aiyp taǵylǵan 9 jasar balanyń kinásiz ekenin málim etken edi. Sent-Djozef okrýgi otbasylyq bóliminiń sýdiasy Devid Tomlinskon Michigan shtatynyń zańy boiynsha bala 10 jasqa tolmaǵandyqtan quzyreti joqtyǵy týraly qaýly qabyldady.
