AQSh Sýdan áskeriniń áreketin "qatań aiyptaidy". AQSh memlekettik hatshysy Entoni Blinken 25 qazan kúni osylai dep málimdedi. Ol sonymen birge Sýdan áskerin premer-ministr men ózge de jetekshilerdi bosatýǵa shaqyrdy.
Buǵan deiin Sýdanda áskeri toptyń úkimetti taratyp, saiasi jetekshilerdi tutqyndap, elde tótenshe jaǵdai jariialaǵany habarlanǵan edi. BBC saitynyń jazýynsha, jurt áskerdiń bilikti basyp alýyna qarsylyq bildirip, kóshege shyqqan. Narazylyq sharasy kezinde keminde jeti adam qaza bolǵan, 140 adam jaralanǵan. Áskeriler narazylyqty uiymdastyrýshylardy qýdalap, úidi-úidi aralap, belsendilerdi ustaǵan.
AQSh memlekettik hatshysy Entoni Blinkenniń aitýynsha, elde tótenshe jaǵdai jariialap, premer-ministr Abdýlla Hamdokty ustaǵan Sýdan áskeriniń qimyly demokratiiaǵa bet buryp kele jatqan memleketti baǵytynan taidyrýy múmkin. Ol Hamdok pen azamattardyń ustalýyna jol berýge bolmaidy dep málimdep, kúshtik qurylymdar olardyń qaýipsizdigin qamtamasyz etip, dereý bosatýy tiis dedi.
General Ábdel-Fattah Býrhan buǵan deiin teledidar arqyly jasaǵan málimdemesinde halyq pen ásker ókilderinen jasaqtalǵan Sýverendi keńes pen Hamdoktiń aýyspaly úkimetin taratyp jibergenin habarlaǵan.
BUU Qaýipsizdik keńesi 26 qazanda Sýdandaǵy jaǵdaidy jabyq esik jaǵdaiynda talqylaidy. Jiynda BUU-nyń Sýdandaǵy ýákili eldegi jaǵdaidy baiandamaq.
