اقش سۋدان ەسكەرٸنٸڭ ەرەكەتٸن "قاتاڭ ايىپتايدى". اقش مەملەكەتتٸك حاتشىسى ەنتوني بلينكەن 25 قازان كٷنٸ وسىلاي دەپ مەلٸمدەدٸ. ول سونىمەن بٸرگە سۋدان ەسكەرٸن پرەمەر-مينيستر مەن ٶزگە دە جەتەكشٸلەردٸ بوساتۋعا شاقىردى.
بۇعان دەيٸن سۋداندا ەسكەري توپتىڭ ٷكٸمەتتٸ تاراتىپ, ساياسي جەتەكشٸلەردٸ تۇتقىنداپ, ەلدە تٶتەنشە جاعداي جارييالاعانى حابارلانعان ەدٸ. BBC سايتىنىڭ جازۋىنشا, جۇرت ەسكەردٸڭ بيلٸكتٸ باسىپ الۋىنا قارسىلىق بٸلدٸرٸپ, كٶشەگە شىققان. نارازىلىق شاراسى كەزٸندە كەمٸندە جەتٸ ادام قازا بولعان, 140 ادام جارالانعان. ەسكەريلەر نارازىلىقتى ۇيىمداستىرۋشىلاردى قۋدالاپ, ٷيدٸ-ٷيدٸ ارالاپ, بەلسەندٸلەردٸ ۇستاعان.
اقش مەملەكەتتٸك حاتشىسى ەنتوني بلينكەننٸڭ ايتۋىنشا, ەلدە تٶتەنشە جاعداي جارييالاپ, پرەمەر-مينيستر ابدۋللا حامدوكتى ۇستاعان سۋدان ەسكەرٸنٸڭ قيمىلى دەموكراتيياعا بەت بۇرىپ كەلە جاتقان مەملەكەتتٸ باعىتىنان تايدىرۋى مٷمكٸن. ول حامدوك پەن ازاماتتاردىڭ ۇستالۋىنا جول بەرۋگە بولمايدى دەپ مەلٸمدەپ, كٷشتٸك قۇرىلىمدار ولاردىڭ قاۋٸپسٸزدٸگٸن قامتاماسىز ەتٸپ, دەرەۋ بوساتۋى تيٸس دەدٸ.
گەنەرال ەبدەل-فاتتاح بۋرحان بۇعان دەيٸن تەلەديدار ارقىلى جاساعان مەلٸمدەمەسٸندە حالىق پەن ەسكەر ٶكٸلدەرٸنەن جاساقتالعان سۋۆەرەندٸ كەڭەس پەن حامدوكتٸڭ اۋىسپالى ٷكٸمەتٸن تاراتىپ جٸبەرگەنٸن حابارلاعان.
بۇۇ قاۋٸپسٸزدٸك كەڭەسٸ 26 قازاندا سۋدانداعى جاعدايدى جابىق ەسٸك جاعدايىندا تالقىلايدى. جيىندا بۇۇ-نىڭ سۋدانداعى ۋەكٸلٸ ەلدەگٸ جاعدايدى بايانداماق.
