AQSh memlekettik departamenti dúisenbi kúni "Soltústik aǵys – 2" gaz qubyry jobasyna qatysqan kompaniialarǵa jańa sanktsiia engizgenin habarlady.
Aqparatqa qaraǵanda, Kiprde tirkelgen Transadria kompaniiasy men oǵan tiesili Marlin kemesine shekteý qoiylǵan. Bul keme gaz qubyryn salǵan kezde paidalanylǵan.
Sanktsiia jaily aqparat AQSh memlekettik departamentiniń Kongreske jibergen sanktsiialar jónindegi esebinde aitylǵan. AQSh memlekettik hatshysy Entoni Blinkenniń málimdemesinde qazirge deiin gaz qubyryna qatysy bar segiz adam jáne 17 kemege sanktsiia salynǵany jazylǵan.
"Soltústik aǵys – 2" jobasynyń qosylýyna múddeli Germaniiamen jaqsy qarym-qatynasty saqtaý qajettigin alǵa tartqan Djo Baiden ákimshiligi Kongress úndeýine qaramastan joba operatoryna sanktsiia salýdan bas tartyp keledi.
Qazir Resei gazy Eýropaǵa Ýkraina arqyly tasymaldanady. AQSh, Eýroodaqtyń birqatar múshesi jáne Ýkrainanyń pikirinshe, atalǵan joba Máskeýdiń Kievke qysymyn údetip, EO-nyń reseilik "Gazpromǵa" táýeldiligin arttyrady. Máskeý mundai qaýip baryn teristeidi.
Qurylysy aiaqtalǵan gaz qubyryn iske qosý merzimi qujat máselelerine tirelip tur. Birinshiden, Eýroodaqtaǵy arnaiy qurylymdar jobany maquldap, iske qosýǵa ruqsat berýi tiis. Bul protsess birneshe aiǵa sozylady. Ekinshiden, gaz qubyryn sertifikatsiiadan ótkizetin Germaniiadaǵy vedomstvo Shveitsariiada shoǵyrlanǵan joba operatorynan Germaniia aýmaǵynda enshiles kompaniia quryp, oǵan aktivteriniń basym bóligin shoǵyrlandyrýdy talap etip otyr. Aqparat quraldarynyń jazýynsha, joba operatory bul talaptardy oryndaýǵa kúsh salady.
