Jerorta teńizindegi AQSh-tyń USS Stethem áskeri kemesinen atylyp jatqan Tomohawk qanatty zymyrandary. Qyrkúiek 2016 jyl (Kórneki sýret).
Amerikalyq aqparat quraldary 7 sáýir kúni tań ata AQSh-tyń osy aptanyń basynda Siriianyń Idlib provintsiiasyndaǵy beibit turǵyndarǵa jasalǵan himiialyq shabýylǵa jaýap retinde Siriianyń áýe bazasyn zymyranmen atqylaǵanyn habarlady. Siriiadaǵy alty jylǵa sozylǵan azamattyq soǵysta AQSh armiiasy Siriia úkimetiniń kúshterine birinshi ret tikelei shabýyl jasap otyr.
Amerikalyq BAQ-tyń aqparatyna qaraǵanda, Siriianyń batysyndaǵy Shairat áýejaiy Jerorta teńizindegi áskeri kemelerden 60-tan astam "Tomogavk" zymyrandarymen atqylanǵan. AQSh biliginiń ókilderiniń aitýyna qaraǵanda, shabýylda ushý-qoný alańdary, ushaqtar men janarmai quiý stantsiialary nysanaǵa alynǵan.
AQSh kúshteri shabýyl jasardyń aldynda ǵana reseilik diplomattar Vashingtondy "kúmándi ári qaiǵyly qadam jasaýdan" saqtandyryp, "onyń keri saldarlaryna bar jaýapkershilik" AQSh-tyń moinyna júkteletinin málimdegen.
4 sáýirde Siriianyń soltústik-batysyndaǵy Idlib provintsiiasynyń kóterilisshiler baqylaityn Han-Sheihýn qalasynda himiialyq shabýylǵa uqsas shabýyldan 70-ten astam adam qaza tapqan. Syrian Observatory for Human Rights uiymynyń málimetinshe, Siriia, ia Resei aviatsiiasy jasaǵan áýe shabýylynan soń ondaǵan adamnyń tynys alýy qiyndap, túrli simptomdar paida bolǵan. Qaza tapqandardyń kópshiligi - beibit turǵyndar.
AQSh prezidenti Donald Tramp himiialyq shabýyldy "jantúrshigerlik" jáne "adamzat úshin masqara áreket" dep ataǵan. Ol shabýyl jaýapkershiligin Siriia prezidenti Bashar Asadqa artyp, qatań jaýap sharalaryn jasaýǵa úndegen.
Áskeri operatsiia týraly aqparat jariia bola salysymen, AQSh Prezidenti arnaiy málimdeme jasady. «Búgin men barlyq órkenietti elderdi Siriiadaǵy qandy qyrǵyndy toqtatý jolyn tabýǵa shaqyramyn. Himiialyq qarýdy taratý jáne qoldanýdyń aldyn alý AQSh ulttyq qaýipsizdigi úshin ómirlik mańyzdy másele. Búginde kúmánsiz fakt bar: Siriia tyiym salynǵan himiialyq qarýdy qoldandy, osylaisha Himiialyq qarý jónindegi konventsiiaǵy mindettemelerin buzdy jáne BUU Qaýipsizdik Keńesiniń talaptaryn oryndamady» dedi Donald Tramp.
