AQSh memlekettik departamenti Reseide ótken parlament jáne jergilikti bilik organyn sailaýdyń qorytyndysyn synap, málimdeme taratty. Onda sailaýdyń "erkin ári ádil" ótpegeni jazylǵan, dep habarlaidy Azattyq.
"Resei úkimetiniń "ekstremistik uiym", "shetel agenti" jáne "kereksiz uiymdar" týraly zańdardy paidalanýy saiasi pliýralizmdi shektep, Resei halqyna ózderiniń azamattyq jáne saiasi quqyqtaryn júzege asyrýyna múmkindik bermedi. Sonymen birge sailaýǵa deiin táýelsiz saiasi tulǵalardy qaralaý talpynysy da baiqaldy, al EQYU baqylaýshylaryna sailaýdy baqylaýǵa múmkindik berilmedi, bul saiasi naýqannyń ashyqtyǵyn azaitty" delingen málimdemede.
Málimdeme avtory "munyń barlyǵy Reseidiń Azamattyq jáne saiasi quqyqtar týraly halyqaralyq pakt, EQYU jáne ózge de halyqaralyq jáne aimaqtyq uiymdar aldynda alǵan mindettemelerine qaishy" dep atap ótken.
"Biz Reseidi halyqaralyq mindettemelerin oryndap, adam quqyǵy men onyń negizgi bostandyqtaryn qurmetteýge, sonymen birge azamattyq qoǵam men saiasi oppozitsiia jáne táýelsiz BAQ-qa qysym jasaýyn doǵarýǵa shaqyramyz" dedi AQSh memlekettik departament ókilderi.
Málimdeme avtory sonymen birge Resei anneksiialap alǵan Qyrym men ózin respýblika dep jariialaǵan "Donetsk" (DNR) jáne "Lýgansk halyq respýblikalarynda" (LNR) memlekettik dýma sailaýynyń ótkenin moiyndamaitynyn da jetkizdi.
Ulybritaniia da osyǵan uqsas málimdeme taratty. Onda Resei biliginiń "azamattyq qoǵamdy marginalizatsiialaýy, táýelsiz BAQ-ty tunshyqtyrýy, shynaiy oppozitsiiany sailaýdan shettetýi saiasi pliýralizmge nuqsan keltiredi" jáne "Reseidiń halyqaralyq qaýymdastyq aldynda alǵan mindettemelerine qaishy" dep kórsetilgen.
Ulybritaniia Ýkrainanyń sýverendi territoriiasy – Qyrymda memlekettik dýma sailaýynyń ótýin zańsyz dep sanaitynyn jetkizdi.
Reseide sailaý 17-19 qyrkúiek aralyǵynda ótken. Baqylaýshylar sailaý kezinde biýlletenderdi toptap salý, baqylaýshylardy sailaý ýchaskesinen shyǵarýǵa tyrysý siiaqty zańbuzýshylyqtar, sailaý qarsańynda qarsylas jaqtyń tanymal kandidattaryna uqsas adamdardy sailaýǵa shyǵarý siiaqty áreketter baiqalǵanyn habarlady.
Resei OSK málimetinshe, Vladimir Pýtindi qoldaityn "Edinaia Rossiia" sailaýda 49 paiyzdan kóp daýys alǵan, KPRF – 19 paiyz, LDPR – 7,49 paiyz, "Spravedlivaia Rossiia – Patrioty – Za pravdý" – 7,42 jáne "Novye liýdi" – 5,35 paiyz daýys jinaǵan. Qalǵan partiialar bes paiyzdyq mejeden óte almaǵan. Reseide parlamenttiń tómengi palatasy – memlekettik dýmaǵa ótý úshin saiasi partiialar sailaýshylardyń keminde 5 paiyz daýysyn jinaýy tiis.
