AQSh-tyń jańadan sailanǵan prezidenti Donald Tramp óz jumysyna kirispei jatyp-aq óz eliniń Qytaimen aradaǵy bailanysyna syzat túsirip aldy. Bul óz kezeginde keler jyly álemdik naryqqa qater bolyp tónýi múmkin dep jazady Investing basylymyna silteme jasaǵan «Egemen Qazaqstan».
Prezidenttik taqqa otyrmai jatyp Donald Tramp AQSh-Qytai qatynasyn ýshyqtyryp aldy. 3 jeltoqsan kúni Taivan ákishiliginiń basshysy Tsaf Inveimen 10 minýt telefon arqyly sóilesken. Oǵan jaýap retinde Qytai Tramptan ózderiniń «biryńǵai Qytai» saiasatyna qurmetpen qaraýdy talap etti. Óitkeni, Qytai Taivandy ózderine táýeldi aimaq retinde tanidy.Al Donald Tramp jeksenbi kúni Fox News arnasyna bergen suhbatynda Amerikanyń Taivanmen araqatynasyna Pekinniń aralasýyna jol bermeitinin málimdedi.
«Qytaidyń maǵan jón siltegenin qalamaimyn. Biz nege «birtutas Qytai» saiasatyn ustaný kerekpiz?», — dedi AQSh-tyń bolashaq kóshbasshysy. Qytai tarapy eger Tramp osy betinen qaitpaityn bolsa, eki el arasyndaǵy barlyq bailanysty úzetinin jetkizdi.
Esterińizge sala keteiik, 37 jyl buryn AQSh Qytaidyń «biryńǵai Qytai» saiasatyn qoldaý maqsatynda Taivanmen bailanysty úzgen edi. Eger Tramp Taivandy óz aldyna táýelsiz el retinde tanyp, onymen tikelei áriptestik quratyn bolsa, 1972 jyldan beri qalyptasqan AQSh-Qytai áriptestigine syzat túspek.
«Tramp álgi qadamy arqyly otpen oinap jatyr. Qytai eshqashan da mundaiǵa tóze almaidy», — deidi Danske Bank sarapshylary.
AQSh-Qytai daǵdarysy halyqaralyq investorlar úshin de jaǵymdy jańalyq bolmaýy tiis. Nátijesinde qos alyptyń teketiresi 2017 jyly qarjylyq daǵdarysqa sebep bolýy múmkin.
Anar Lepesova
