Resei prezidentiniń baspasóz hatshysy Dmitrii Peskov dissident Aleksei Navalnyi úshin Resei úkimetin aiyptaýǵa negiz joq dep sanaidy. "Oppozitsionerge ý berý kimge tiimdi boldy?" degen suraqqa naqty eshteńe aita almaitynyn jetkizdi.
"Bul bireýge tiimdi bolýy múmkin dep sanamaimyn. Resei úkimetin aiyptaýǵa esh negiz joq" dedi ol 3 qyrkúiekte.
Peskov sóz arasynda “Berlindegi patsientke (Navalnyidy meńzep otyr) ne bolǵanyn anyqtaýǵa biz de múddelimiz” dedi.
2 qyrkúiekte Germaniia biligi zerthana mamandarynyń deregine súiene otyryp, Berlindegi aýrýhanada es-tússiz jatqan Aleksei Navalnyidyń aǵzasynan "Novichok" tobyna kiretin himiialyq ýly zat tabyldy dep málimdegen edi. Budan keiin Germaniia kantsleri Angela Merkel Reseiden túsinikteme talap etip, Kanada, Frantsiia, Ulybritaniia jáne ózge elder "saiasatkerge ý berýdi" aiyptap, oqiǵany ashyq zertteýge shaqyrǵan.
Vashington Reseide saiasatkerdiń ýlanýyna kinálilerdi jaýapkershilikke tartyp, qastyq áreketterin shekteý máselesin áriptesterimen talqylaitynyn jetkizdi. Kongress Tramp ákimshiligin Reseige sanktsiia salýǵa shaqyrdy. NATO da Resei saiasatkerdiń ýlaný isin tolyq ári ashyq zertteýi tiis dedi.
AQSh-taǵy prezident sailaýyna demokrattar atynan qatysatyn Djo Baiden "Kreml qarsylasynyń únin óshirý úshin taǵy da óziniń súiikti qarýy - "Novichokqa" júgindi" dep Resei biligin aiyptady. Ol qarsylasy Trampty únsizdigi úshin synady.
Arkanzas shtatynan sailanǵan respýblikashyl-senator Tom Kotton Germaniiany reseilikterdi jaýapkershilikke tartý úshin "Soltústik aǵys - 2" qubyr qurylysyn toqtatýǵa shaqyrdy.
Kreml synshysy, Reseidegi jemqorlyqty zerttep júrgen Aleksei Navalnyi 20 tamyzda Omby qalasynyń aýrýhanasyna es-tússiz kúide túsken. Resei dárigerleri saiasatkerdiń mundai halge túsýiniń sebebin anyqtai almaǵan. Keiinirek týystary men jaqtastarynyń ótinishi boiynsha saiasatker Berlindegi "Sharite" aýrýhanasyna ushaqpen jetkizilgen.
Ótken aptada nemis dárigerleri Navalnyi holinesteraz ingibitorymen ýlanǵan bolýy múmkin dep málimdedi. Al Resei biligi emdeý kezinde naýqastyń aǵzasynan ýly zat tabylmaǵanyn aityp, Germaniia dárigerleri qolda bar málimetterimen bólissin degen.
Saiasatkerdiń baspasóz hatshysy Kira Iarmysh 2 qyrkúiekte Twitter jelisinde "Navalnyi áli esin jimady, jasandy tynys alý apparatymen demalyp jatyr. Jaǵdaiy áli aýyr" dep jazǵan.
Saiasatkerdiń jaqtastary Navalnyiǵa ý bergen dep sanaidy. Olar buǵan deiin bilikten oqiǵaǵa bailanysty qylmystyq is qozǵaýdy talap etken.
