AQSh reseilik oppozitsiialyq saiasatker Aleksei Navalnyi ýlanǵan dep tujyrym jasaǵan Germaniia dárigerleri taratqan málimdemege alańdap otyrǵanyn jetkizdi. Eger habarlama rastalsa, AQSh oqiǵany jan-jaqty zertteýge shaqyrǵan Eýroodaqtyń usynysyn qoldap, zertteýge atsalysýǵa daiyn ekenin de málimdedi. AQSh memlekettik hatshysy Maik Pompeonyń málimdemesi 25 tamyzda AQSh memlekettik departamentiniń saitynda jariialandy.
"Navalnyidyń otbasy jáne Resei halqy jan-jaqty jáne ashyq zertteý júrgizip, qatysy bar adamdardy jaýapkershilikke tartýǵa laiyq. Biz Aleksei Navalnyi otbasymen birgemiz jáne ol tolyq jazylyp shyǵady dep úmittenemiz" delingen 25 tamyz kúngi málimdemede.
Resei syrtqy ister ministri Sergei Lavrov pen AQSh memlekettik hatshysynyń orynbasary Stiven Bigan eki el arasyndaǵy qarym-qatynas máselelerin talqylaǵannan keiin vedomstvo túsinikteme jariialady. Talqylaý kezinde Aleksei Navalnyi máselesi de qozǵalǵan.
Navalnyiǵa ý bergeni rastalsa, Vashington Máskeýge sanktsiia salady degen AQSh eskertýine toqtalǵan ministrlik Resei biligi jalań aiyptaýlarǵa jol bermeidi dep aitqan. Resei basshylyǵy da oqiǵany muqiiat ári obektivti zertteýdi qoldaidy dep málimdegen.
Oppozitsiialyq saiasatkerdi emdep jatqan Berlindegi "Sharite" aýrýhanasy dúisenbi kúni Navalnyidyń aǵzasynan ýly zattar tabylǵanyn habarlaǵan bolatyn. Izinshe Germaniia biligi Reseidi Navalnyidyń ýlanýyn jan-jaqty zertteýge shaqyrǵan edi. Al Kreml baspasóz hatshysy Dmitrii Peskov 25 tamyzda Aleksei Navalnyidyń jaǵdaiyna bailanysty is qozǵaýǵa ázirge negiz joq dep aitqan bolatyn.
