Foto: russian.rt.com
AQSh Reseidiń syrtqy ister ministri Sergei Lavrov bastaǵan orys delegatsiiasyna BUU-nyń Qaýipsizdik keńesiniń otyrysyna qatysý úshin viza bermei jatyr. Bul týraly Reseidiń AQSh-taǵy elshiligi málimdedi.
Resei 1 sáýirde BUU Qaýipsizdik keńesine tóraǵalyq etedi. Al 24-25 sáýirde keńestiń otyrysy ótedi.
Reseidiń AQSh-taǵy elshisi Anatolii Antonov orys delegatsiia múshelerine viza alý úshin AQSh elshiligine naýryzdyń sońynda ótinish berilgenin, biraq maquldanbaǵanyn aitty. Ol Vashingtondy orys delegatsiiasyna jáne jýrnalisterge viza berýge úndedi.
Diplomat ministr Lavrovtyń tóńireginde de túsiniksiz jaǵdai bolyp jatqanyn aitty.
– AQSh biligi ushaqtyń kelýine múmkindik bermei jatyr. Amerikalyqtardyń áýe kemesiniń eshqandai kedergisiz ushýyna ruqsat berýin kútip otyrmyz, – dedi Antonov.
Aita keteiik, Resei Ýkrainaǵa basyp kirgennen keiin EO orys ushaqtary úshin áýe keńestigin japqan.
