© Sputnik / Bolat Shaihinov
Memleket basshysy Qasym-Jomart Toqaevtyń atyna Qazaqstan Respýblikasy Táýelsizdiginiń 30 jyldyǵyna orai shet memleketterdiń basshylarynan jáne halyqaralyq uiymdardyń jetekshilerinen quttyqtaý hattary men jedelhattar kelip túsip jatyr, dep habarlaidy "Ult aqparat" Aqordaǵa silteme jasap.
Resei Prezidenti Vladimir Pýtin óziniń jedelhatynda Memleket basshysyn Táýelsizdik kúnimen shyn júrekten quttyqtap, Qazaqstannyń ekonomikalyq, áleýmettik, ǵylymi-tehnikalyq jáne basqa da kóptegen saladaǵy qol jetkizgen tabystaryn atap ótken. Resei Prezidenti elimizdiń álemdik arenadaǵy joǵary bedeline erekshe toqtalǵan.
– Memleketterimiz arasyndaǵy qarym-qatynastar strategiialyq seriktestik pen odaqtastyq negizde qarqyndy damyp keledi. Túrli saladaǵy ekijaqty yntymaqtastyq, sondai-aq EAEO, UQShU, TMD, ShYU, BUU siiaqty halyqaralyq qurylymdar aiasyndaǵy ózara is-qimyldarymyz óz nátijesin berýde. Birlesken kúsh-jiger arqyly biz dostas halyqtarymyzdyń igiligi jolynda, sondai-aq Eýraziia qurlyǵyndaǵy turaqtylyq pen qaýipsizdikti qamtamasyz etý úshin Resei men Qazaqstan arasyndaǵy bailanystardy dáiekti túrde damytatynymyzǵa senimdimin, – delingen Vladimir Pýtinniń jedelhatynda.
QHR Tóraǵasy Si Tszinpin óziniń quttyqtaýynda Táýelsizdiktiń 30 jyly ishinde Qazaqstan memlekettiń múlde jańa kelbetin qalyptastyrǵanyn, álemdegi ozyq damyǵan 30 eldiń qataryna kirý úshin nyq qadam basyp kele jatqanyn jazǵan.
– Men Qytai-Qazaqstan qarym-qatynastarynyń damýyna erekshe mán beremin. Sizben birge Qytai men Qazaqstan arasyndaǵy dástúrli dostyqty nyǵaitýǵa, eki eldiń strategiialaryn ushtastyrýǵa, máńgi jan-jaqty strategiialyq áriptestik qatynastardy eki memlekettiń jáne olardyń halyqtarynyń igiligi úshin jańa deńgeige kóterýge daiynmyn, – delingen jedelhatta.
AQSh Prezidenti Djozef Baiden Qasym-Jomart Toqaevty jáne Qazaqstan halqyn Táýelsizdiktiń 30 jyldyǵymen quttyqtap, Qazaqstannyń Ortalyq Aziiada jáne jahandyq deńgeide beibitshilik pen turaqtylyqty saqtaý jáne ony órkendetý jolyndaǵy otyz jyldyq kóshbasshylyǵyn atap ótý merekesine tilektestik bildirdi.
– Qurama Shtattary Qazaqstanmen aradaǵy strategiialyq seriktestikti nyǵaitýǵa, aimaqtyq turaqtylyqqa úles qosý maqsatymen yntymaqtastyqty damytýǵa, klimattyq daǵdarysty eńserýge, demokratiialyq institýttardyń tiimdiligin arttyrýǵa jáne adam quqyqtaryn qurmetteýge baǵyttalǵan yqpaldastyqty ilgeriletýge nietti, – delingen Amerika basshysynyń jedelhatynda.
Ózbekstan Prezidenti Shavkat Mirziioev Qazaqstanda júrgizilip jatqan júieli ári aýqymdy reformalardy, sondai-aq Qasym-Jomart Toqaev usynǵan aimaqtyq jáne jahandyq mańyzy bar bastamalardy joǵary baǵalady.
– Osynaý zor jetistikterge Memleket basshysy retinde Sizdiń tiimdi qyzmetińiz ben bai tájiribeńizge súiene otyryp júrgizgen saliqaly saiasatyńyz negiz boldy. Qurmetti Qasym-Jomart Kemeluly, Táýelsizdiktiń 30 jyldyǵyn saltanatty túrde atap ótip jatqan Qazaqstan halqynyń qýanyshyna búkil Ózbekstan halqy shynaiy túrde ortaqtasatynyn aitqym keledi, – delingen jedelhatta.
Qyrǵyzstan Prezidenti Sadyr Japarov elimizdiń Táýelsizdik jyldarynda saiasi, ekonomikalyq jáne áleýmettik salalardaǵy, sondai-aq syrtqy saiasattaǵy qol jetkizgen keremet jetistikteri men aýqymdy reformalarynyń arqasynda álemdik qoǵamdastyqta salmaqty orynǵa ie bolǵanyn atap ótken.
– Tarihi berik dostyq bailanystarǵa negizdelgen qyrǵyz-qazaq qatynastary aldaǵy ýaqytta da halyqtarymyzdyń múddesi úshin nyǵaiyp dami beretinine senimdimin. Qazirgi ýaqytta qarym-qatynastarymyz odaqtastyq jáne strategiialyq seriktestik rýhyna tolyq sai keledi. Biz ózara kúsh jumyldyra otyryp, barlyq qol jetkizilgen ýaǵdalastyqtardy, barlyq baǵyt boiynsha alǵa qoiǵan maqsat-mindetterimizdi júzege asyratynymyzǵa senimdimin, – delingen Qyrǵyzstan Prezidentiniń jedelhatynda.
Túrikmenstan Prezidenti Gýrbangýly Berdimuhamedov óz quttyqtaýynda Qazaqstannyń saiasatta, ekonomikada jáne áleýmettik-gýmanitarlyq salalarda úlken jetistikterge qol jetkizgenin jáne álemdik arenada alǵa qarai nyq qadam basyp kele jatqanyn atap ótken.
– Túrikmenstan men Qazaqstan arasyndaǵy tatý kórshilik, dostyq jáne ózara túsinistik qaǵidattaryna negizdelgen baýyrlastyq qatynastar halyqtarymyzdyń jarqyn bolashaǵy jolynda qarqyndy dami beretinine senimdimin, – delingen Túrikmenstan Prezidentiniń quttyqtaýynda.
Tájikstan Prezidenti Emomali Rahmon Qazaqstannyń memlekettilikti qalyptastyrýdaǵy, áleýmettik-ekonomikalyq jáne qoǵamdyq-saiasi damý isindegi jetistikterin, sondai-aq halyqaralyq arenadaǵy bedelin joǵary baǵalaǵan.
– Biz Tájikstan men Qazaqstannyń strategiialyq seriktestigin nyǵaitýǵa jáne kópǵasyrlyq dostyq arqaýyn jan-jaqty bekemdeýge, memleketterimiz arasyndaǵy ózara túsinistik pen qoldaýǵa basa mán beremiz. Biz kúsh jumyldyra otyryp, halyqtarymyzdyń igiligi úshin eki eldiń kópjosparly memleketaralyq yntymaqtastyǵyn ilgerilete beretinimizge senim bildiremin, – delingen Tájikstan Prezidentiniń quttyqtaýynda.
Belarýs Prezidenti Aleksandr Lýkashenko elimizdiń tarihi ólshemmen alǵanda qysqa merzim ishinde zor jetistikterge qol jetkizgenin, barlyq etnos ókilderi arasynda tózimdilikti, dinaralyq jáne mádenietaralyq kelisimdi qamtamasyz etýdiń jarqyn úlgisin pash etkenin atap ótken.
– Qazaqstan senimdi túrde zamanaýi jáne básekege qabiletti memleket qalyptastyrýda. Minsk men Nur-Sultan arasyndaǵy ózara senim men qurmetke negizdelgen strategiialyq odaqtastyq qatynastardyń odan ári keńeiip, jańa jasampaz jobalarmen tolyǵa beretinine senimdimin, – delingen Belarýs basshysynyń jedelhatynda.
Frantsiia Prezidenti Emmanýel Makron óz quttyqtaýynda Qasym-Jomart Toqaevty jáne dostas Qazaqstan halqyn shyn júrekten quttyqtap, baq-bereke tilegen. Frantsýz kóshbasshysy Frantsiia men Qazaqstan arasyndaǵy strategiialyq seriktestiktiń qarqyndy damyp kele jatqanyn atap ótken. Sonymen qatar ol tehnologiialyq innovatsiia, energetika, «jasyl» ekonomikalyq ósim men ornyqtylyqty ilgeriletý, kólik jáne taý-ken ónerkásibi, densaýlyq saqtaý, mádeni-gýmanitarlyq yntymaqtastyq salalaryndaǵy ekijaqty yqpaldastyqty nyǵaitý úshin zor múmkindik bar ekenine nazar aýdarǵan.
– Eger Sizdiń tyǵyz jumys kesteńiz múmkindik beretin bolsa, ekijaqty kún tártibindegi mańyzdy máselelerdiń bárin jan-jaqty talqylaý úshin Ózińizben Parijde kezdesýge qýanyshty bolar edim, – dep jazǵan Emmanýel Makron.
Germaniia Prezidenti Frank-Valter Shtainmaier de óziniń júrekjardy quttyqtaýyn joldaǵan.
– Koronavirýs pandemiiasy ózara bailanystarymyzdy shektese de, elderimiz ótken jyly turaqty jáne jemisti qarym-qatynastardy jalǵastyrdy. Aýǵanstandaǵy jýyrda bolǵan oqiǵalar jáne kúnnen kúnge kúsheiip jatqan klimattyq ózgeristerdiń áseri Sizderdiń aimaqqa jańa ári kúrdeli mindet júktep otyr. Biz muny jaqsy sezinemiz. Germaniia aldaǵy ýaqytta osy jáne basqa da syn-qaterlerdi sátti eńserýde jáne Siz qoldaǵan reformalar baǵytyn jalǵastyrý jolynda Qazaqstannyń senimdi seriktesi bolyp qala beredi, – dep Frank-Valter Shtainmaier óziniń jedelhatynda atap ótken.
Qazaqstan Táýelsizdiginiń 30 jyldyǵyna orai ózderiniń quttyqtaý jedelhattaryn Ázerbaijan Prezidenti Ilham Áliev, Armeniia Prezidenti Armen Sarkisian, Grýziia Prezidenti Salome Zýrabishvili, BAÁ Prezidenti Halifa ben Zaid Ál Nahaian, BAÁ Vitse-prezidenti, Premer-Ministri, Dýbai ámirliginiń bileýshisi Mýhammed ben Rashid Ál Maktým, Abý-Dabidiń Taq murageri, BAÁ Qarýly Kúshteriniń Joǵarǵy Bas qolbasshysynyń orynbasary Mýhammed ben Zaid Ál Nahaian, Saýd Arabiiasynyń Koroli Salman ben Abdelaziz Ál Saýd jáne Saýd Arabiiasy Koroldiginiń Taq murageri Mýhammed ben Salman ben Abdelaziz Ál Saýd, Iran Prezidenti Ibrahim Raisi, Ispaniia Koroli VI Felipe, Malaiziia Koroli II Abdýlla, Bahrein Koroli Hamad ben Isa Ál Halifa, Marokko Koroli VI Mýhammed, Tailand Koroli Maha Vachiralongkorn, Singapýr Prezidenti Halima Iakob, Finliandiia Prezidenti Saýli Niinistio, Polsha Prezidenti Andjei Dýda, Avstriia Prezidenti Aleksandr Van der Bellen, Chehiia Prezidenti Milosh Zeman, Úndistan Prezidenti Ram Nat Kovind, Izrail Prezidenti Itshak Gertsog, Mońǵoliia Prezidenti Ýhnaagiin Húrelsúh, Braziliia Prezidenti Jair Bolsonarý, Rýmyniia Prezidenti Klaýs Verner Iohannis, Latviia Prezidenti Egils Levits, Estoniia Prezidenti Alar Karis, Sloveniia Prezidenti Borýt Pahor, Bangladesh Prezidenti Mohammed Abdýl Hamid, Vetnam Prezidenti Ngýen Sýan Fýk, Kýba Prezidenti Migel Dias-Kanel, Palestina Prezidenti Mahmýd Abbas, Serra-Leone Respýblikasynyń Prezidenti Djýliýs Maada Bio joldady.
Sonymen qatar quttyqtaý jedelhattaryn ShYU Bas hatshysy Vladimir Norov, TMD Atqarýshy komitetiniń tóraǵasy – Atqarýshy hatshysy Sergei Lebedev, UQShU Bas hatshysy Stanislav Zas, Ekonomikalyq yntymaqtastyq uiymynyń Bas hatshysy Hýsrav Noziri, Eýropalyq qaita qurý jáne damý bankiniń prezidenti Odil Reno-Basso, ESKATO-nyń atqarýshy hatshysy Armida Salsia Alisdjabana, ISESKO-nyń bas direktory Salim ál-Malik, Eýropadaǵy qaýipsizdik jáne yntymaqtastyq uiymynyń az ulttar jónindegi Joǵarǵy komissary Qairat Ábdirahmanov, TúrkPA-nyń Bas hatshysy Mehmet Sýreiia Er, sondai-aq BAÁ Premer-ministriniń orynbasary, Prezident isteri jónindegi ministr Mansýr ben Zaid Ál Nahaian, Izraildiń Qarjy ministri Avigdor Liberman, Penza oblysynyń gýbernatory Oleg Melnichenko, M.Lomonosov atyndaǵy Máskeý memlekettik ýniversitetiniń rektory Viktor Sadovnichii joldady.
Quttyqtaý jedelhattary áli de kelip túsip jatyr.
