Dúisenbi, mamyrdyń 11-ine AQSh kongresiniń ókilder palatasy Resei biliginiń táýelsiz jýrnalisterdi, oppozitsionerlerdi, azamattyq qoǵam men dini uiym ókilderin qýǵyndap, túrmege qamaǵanyn aiyptaityn zań jobasyn usyndy.
Ókilder palatasynyń halyqaralyq ister jónindegi komitetiniń jetekshisi Elliot Engel men respýblikashyl Maikl Makkol bastama bolǵan zań jobasynda Resei túrmesi men úiqamaqta úsh júzge jýyq saiasi tutqyn bar ekeni aitylady, onyń altaýynyń aty-jóni atalǵan: Aleksei Pichýgin, Igor Rýdnikov, Konstantin Kotov, Anastasiia Shevchenko, Iýrii Dmitriev jáne Dennis Kristensen. Rezoliýtsiia memlekettik departament, EQYU, halyqaralyq quqyq qorǵaý uiymdary men "Memorial" qoǵamynyń málimetterine negizdelgen.
Qujatta "Memorial" qoǵamy saiasi tutqyn dep sanaǵan adamdardy qamaýdan bosatýǵa shaqyrǵan. Amerika zań shyǵarýshylary memlekettik hatshy men AQSh qarjy ministrine "Magnitskii akti" boiynsha ókiletin paidalaný jáne Reseidiń saiasi qýǵyndaýǵa qatysy bar resmi tulǵalaryna sanktsiia salý jóninde usynys jasady.
"Vladimir Pýtin bárinen buryn shyndyqtan qorqady, - dedi kongressmen Maikl Makkol. – Zańdy Resei prezidenti qýǵyn quralyna ainaldyrdy. Ol jýrnalisterdi jaq ashpaýǵa májbúrlep, saiasi qarsylastaryn qorqytyp-úrkitedi... Qysym kórgenderdi qorǵaý jolynda daýysymyzdy bildirýden qoryqpaýymyz kerek".
