AQSh-tyń bir top zań shyǵarýshysy Resei jáne Belarýspen "turaqty jáne qalypty saýda qatynastaryn úzý týraly" zań jobasyn ázirlegenin málimdedi, dep habarlaidy Azattyq.
"Reseiden energetikalyq taýar importtaýǵa tyiym salatyn jáne Resei, Belarýspen saýda qatynastaryn toqtatatyn zań jobasyn usyndyq" dedi olar málimdemesinde.
Kongrestegi Respýblikalyq partiia men Demokratiialyq partiia jetekshileri qoldaǵan zań jobasy taiaý arada qaralady, maquldansa AQSh prezidenti Djo Baidenge jiberiledi.
Djo Baiden buǵan deiin "AQSh-ta janar-jaǵar mai qymbattap ketýi múmkin" degen qaýippen bul jóninde pikirin ashyq aitpaǵan. AQSh paidalanatyn munaidyń 7 paiyzǵa jýyǵyn Reseiden importtaidy. Alaida jeksenbide AQSh memlekettik hatshysy Entoni Blinken Aq úidiń Resei munaiyn importtaýǵa tyiym salý múmkindigin qarastyratynyn aitqan.
Resei jáne Belarýspen "qalypty saýda qatynasy" úzilse, bul eki eldiń taýarlarynyń import alymy 30 paiyzǵa deiin ósedi. Qazir ol 3 paiyz ǵana. Reseidiń AQSh-qa negizgi eksporty – munai, metall, platina men tyńaitqysh.
AQSh bul sharany Reseidiń Ýkrainaǵa basqynshylyǵyna jaýap retindegi sharanyń biri dep esepteidi.
