Irannyń jańa prezidenti Ibrahim Raisi qyzmetine kirisken kezde parlamentte ant berip tur. Tegeran, 5 tamyz 2021 jyl.
AQSh Irannyń jańa prezidenti, saiasatta óziniń qatqyl baǵyt ustanýymen máshhúr Ibrahim Raisidi 2015 jylǵy iadrolyq kelisimdi qaita jandandyrý týraly kelissózge oralýǵa úndedi. Raisi 5 tamyzda qyzmetine resmi kirisken kezde óz eline salynǵan sanktsiialardy joiýdyń diplomatiialyq joldaryn izdestiretinin málimdegen. Izinshe Vashington oǵan álgindei usynys jasady, dep habarlaidy Azattyq.
"Biz Irandy tez arada kelissózderge oralýǵa shaqyramyz. Biz úshin bul kezek kúttirmeitin basymdyq" dedi AQSh memlekettik departamentiniń ókili Ned Prais baspasóz brifinginde.
Raisi prezident inaýgýratsiiasy rásiminde sóilegen sózinde sanktsiialardyń kúshin joiǵysy keletinin aitqan.
"Eger prezident Raisi sanktsiialardyń joiylýyn shynymen qalasa, Venada dál osy másele ashyq talqylanyp jatyr emes pe" dedi Prais Avstriia astanasyndaǵy iadrolyq kelisimdi qalpyna keltirý jaily júrip jatqan kelissózdi meńzep.
AQSh-tyń burynǵy prezidenti Donald Tramptyń biligi kezinde Vashington Iran ekonomikasyna aýqymdy túrde tereń teris áseri bar sanktsiialardy qaitadan kúshine engize otyryp, 2015 jylǵy iadrolyq kelisimnen shyqqan bolatyn.
"Birikken keshendi is -qimyl josparyna" (talaptaryna) sáikes, saiasat júrgizý shartyna tize qosa otyryp oralýǵa qol jetkizý múmkindigi máńgi-baqi bola bermeidi" dep málimdedi Prais.
Buǵan deiin Venadaǵy kelissóz alty raýndtan keiin toqtap qalǵan edi. Irannyń iadrolyq kelissóz júrgizetin tobynyń jetekshisi ótken aida kelesi raýndtyń bastalýyn Ibrahim Raisidiń qyzmetine kiriskenshe kútý keregin aitqan bolatyn.
- Iran jáne taǵy alty el (Ulybritaniia, Germaniia, Qytai, Resei, AQSh, Frantsiia) arasynda 2015 jyly shildede iadrolyq kelisimge qol qoiylǵan. Kelisim Irannyń iadrolyq baǵdarlamasy men qarýlanýyna ýaqytsha shekteý qoiady. Esesine Tegeranǵa salynǵan halyqaralyq sanktsiia jumsarýy tiis.
- 2018 jylǵy mamyrda AQSh prezidenti Donald Tramptyń ákimshiligi bul kelisimnen shyǵyp, Iranǵa birjaqty sanktsiia salǵan. Bul qujatqa qol qoiǵan ózge elderdiń narazylyǵyn týǵyzǵan. Tegeran jaýap retinde óz mindetterinen birtindep bas tarta bastaǵan.
- Keiin AQSh-tyń jańa prezidenti Djo Baiden ákimshiligi iadrolyq kelisimge qaita qosylý máselesin qarastyrýǵa ázir ekenin málimdegen. Eki tarap kelisimdi qaita kúshine engizýge ynta tanytyp, biyl sáýirde Venada kelissóz bastalǵan.
