AQSh prezidenti Djo Baiden men Irak premer-ministri Mustafa ál-Kazymi Iraktaǵy amerikalyq áskeri missiiany toqtatý týraly kelisimge qol qoidy, dep habarlaidy "Ult aqparat" Reuters agenttigine silteme jasap.
Qol qoiylǵan kelisimge sáikes, AQSh Iraktaǵy áskeri missiiasyn osy jyldyń sońyna deiin resmi túrde aiaqtaidy. Bul – Amerika áskerleri alǵash ret elge jiberilgennen keiin 18 jyl ótken soń bolǵaly turǵan oqiǵa.
AQSh prezidenti Djo Baiden men Irak premer-ministri Mustafa ál-Kazymi arasyndaǵy alǵashqy betpe-bet kezdesý elderdiń strategiialyq dialogy aiasynda Aq úide ótti.
"Islam memleketi" ekstremistik uiymǵa qarsy kúreste Irak biligimen áriptes ornatý aimaqtaǵy turaqtylyq úshin óte mańyzdy boldy dedi Baiden.
«Bizdiń Iraktaǵy missiiamyz jalǵasady. Birlesken jattyǵýlardy jalǵastyramyz, terroristik toptarǵa qarsy kúreske kómektesip, qajetti jaǵdailardy jasaimyz. Alaida osy jyldyń sońyna deiin áskeri missiiamyzdy toqtata turamyz», – dedi Djo Baiden.
Qazirgi tańda Irakta DAISh oshaqtarymen kúresýge qatysatyn 2500 AQSh áskeri kúshteri bar. Kelisimge qol qoiylǵannan keiin AQSh-tyń róli Irak armiiasyna ony qorǵaýǵa daiyndyq pen qoldaý kórsetý bolady. Alaida Irakta qalatyn ásker sany týraly málimetter habarlanbady.
Irak pen AQSh-tyń birlesken málimdemesinde densaýlyq saqtaý, energiia jáne basqa da máseleler týraly kelisimder aityldy.
AQSh Irakqa COVAX baǵdarlamasy aiasynda 500 000 Pfizer/BioNTech vaktsinalaryn jetkizýge nietti.
Amerika prezidentiniń aitýynsha, jetkizý jumystary birneshe apta ishinde júzege asyrylady.
Sondai-aq AQSh qazan aiynda BUU-nyń Iraktaǵy aldaǵy sailaýdy baqylaý missiiasyn qarjylandyrý úshin 5,2 million dollar bóledi.
Buǵan deiin Irak parlamenti úkimetti AQSh áskerleri men basqa shet memleketterdiń qarýly kúshterin elden shyǵarýǵa shaqyrǵany týraly habarlanǵan bolatyn.
Vashington osyǵan deiin Aýǵanstannan 11 qyrkúiekke deiin áskerin tolyq alyp ketý jóninde sheshim shyǵarǵan.
AQSh prezidenti Taiaý Shyǵystaǵy terrorizmmen kúresti toqtatpaitynyn aityp, biraq negizgi nazardy Qytaiǵa buratynyn málimdedi. Vashington qazir AQSh úshin Qytai áreketi qaýipsizdikke qaýip tóndiredi dep esepteidi.
