AQSh Qytaidyń jeti sheneýnigine "Gonkongtegi demokratiialyq qundylyqtarǵa qaýip tóndirdi" dep sanktsiia saldy.
AQSh qarjy ministrligi jariialaǵan sanktsiiaǵa Qytaidyń Gonkongtegi bailanys bóliminiń sheneýnikteri ilingen. Pekin bul bólimdi Gonkongte óziniń saiasatyn júrgizý úshin qoldanady.
Qara tizimge bailanys bóliminde basshylyq qyzmet atqaratyn Chen Dýn, He Tszin, Lý Sinnin, Tsiý Hýn, Dan Tianýi, Ian Tszianpin, In Tszýnhýa jáne olardyń orynbasarlary engen.
AQSh memlekettik hatshysy Entoni Blinken "keiingi ýaqytta Qytai sheneýnikteri Gonkongte demokratiialyq qundylyqtardy júieli túrde buzyp, bilikpen kelispegen myńdaǵan adamdy qamady" dedi.
2019 jyldan beri Gonkongte Qytai saiasatyna qarsy narazylyq kúsheigen.
Qytai "Gonkong territoriiasynda júrgen adam qandai da bir iske kúdikti bolsa, ony Pekinge berý týraly" zańyn usynǵan soń Gonkongte jappai narazylyq bolǵan edi.
Budan bólek, Qytai biligi 2020 jyly 30 maýsymda Gonkongtiń ulttyq qaýipsizdigi týraly zań qabyldaǵan. Qaýipsizdik týraly zańǵa sáikes, Pekin satqyndyq, separatizm nemese terrorizm dep tapqan kez kelgen áreketti jasaǵan adam ómir boiyna bas bostandyǵynan aiyrylýy múmkin. Bul zań Gonkongtiń ózi ishinde jáne Batys elderi tarapynan qatań synǵa ushyraǵan. Olar zań Gonkongte saiasi qýǵyndy kúsheitedi, turǵyndardyń bostandyǵyn shekteidi dep sanaidy.
2019 jyldan beri Gonkongtegi narazylyqtyń beldi músheleriniń kóbi qamaldy.
1997 jyly Ulybritaniia Gonkongti Qytaiǵa bergen, biraq bul shaǵyn elde "bir el – eki júie" saiasaty bolǵan. Iaǵni, Gonkong 2047 jylǵa deiin ishki saiasatyn ózi anyqtaýǵa múmkindik alǵan. Ákimshilik aýmaq Pekinge tek syrtqy saiasat pen qorǵanys máselesinde baǵynatyn bolǵan. Biraq qazir Qytai Gonkongke túrli zańdar engizip, tolyq baqylaý ornatýǵa tyrysyp jatyr.
