Foto: primeminister.kz.
Qazaqstandaǵy AQSh elshisi Deniel Rozenbliým shetel qarjylandyratyn tulǵalar tizimi týraly pikir bildirdi, dep habarlaidy QazAqparat agenttigi.
Búgin elordada AQSh elshisi tilshilermen dóńgelek ústel otyrysyn ótkizdi. Onda jýrnalister Qazaqstandaǵy shetel qarjylandyratyn tulǵalar tizimi týraly elshiniń pikirin surady.
«Men bul tizim týraly estidim jáne bizdiń elshilik muny jiti baqylap otyr. Sondai-aq biz osy tizim jariialanǵannan keiingi túrli ÚEU men mediauiymdardyń reaktsiialaryn baqylap otyrmyz. Kei adamdar osy tizim men basqa elderdegi «sheteldik agentter» dep atalatyn zańdardy salystyryp jatyr. Mundai salystyrýlar nelikten jasalatynyn túsinemin, biraq qazirgi ýaqytta bul ártúrli nárse ekenin aitqym keledi», – dep jaýap berdi Rozenbliým.
Elshiniń aitýynsha, bul qazaqstandyq tizimde bolý ondaǵy uiymdar men adamdar úshin zańmen bailanysty esh másele týdyrmaidy.
«Jáne bul olardyń kúndelikti jumysyna esh áser etpeidi. Biz bul jaǵdaidyń osy qalpynda bolýyn qalaimyz, sondyqtan bul uiymdardyń jumysyna esh kedergi bolmaidy. Biz buǵan baqylaýdy jalǵastyramyz. Qazaqstan Úkimeti nemese úkimettik emes uiymdar ne aitatynyn kóreiik. Eger bizde qandai da bir alańdaýshylyq týyndasa, Úkimetpen sóileskende bul taqyrypty mindetti túrde kóteremiz», – dedi diplomat.
Eske salaiyq, 20 qyrkúiek kúni Memlekettik kirister komiteti biylǵy birinshi jartyjyldyqta sheteldik kózderden aqsha nemese ózge de múlik alǵan tulǵalardyń tizimin jariialady. Qujatqa ártúrli baǵytta jumys isteitin 240 uiymnyń ataýy men azamattardyń esimi engen. Tizilimde uiymdar men jeke adamdardyń biznes-sáikestendirý nómirleri (BSN) jáne jeke sáikestendirý nómirleri (JSN) kórsetilgen.
