Álemdegi birqatar el Resei ushaqtaryn áýe keńistigine jibermeýine bailanysty AQSh-tyń Máskeýdegi elshiligi Amerika azamattaryn Reseiden tez arada ketýge shaqyrdy.
"Áýe kompaniialary birinen keiin biri ushýdy doǵaryp jatyr… AQSh azamattary ázirge ushyp jatqan kommertsiialyq reistermen bolsa da, Reseiden ketip qalýdy oilastyrǵany durys", - deidi AQSh dipmissiiasynyń saity.
Batys Reseidiń Ýkrainaǵa shabýylyn Ekinshi dúniejúzilik soǵystan keiingi eń iri shabýyl dep sanap, Máskeýge qatań sanktsiialar salǵan.
27 aqpanda Eýropa odaǵyna múshe memleketter syrtqy ister ministrleriniń kezdesýinen keiin olardyń dúisenbiden bastap Resei ushaqtaryna áýe keńistigin jabý jóninde ýaǵdalasqany málim boldy. Oǵan deiin Eýropanyń kei elderi óz betinshe osyndai shara qolǵa alǵan bolatyn. Máskeý bul áreketke dál solai jaýap berip, bul elderdiń ushaqtaryna Resei áýe keńistigin jabatynyn málimdedi.
Eýropa elderiniń áýe keńistiginiń jabylýyna bailanysty "Aeroflot" 28 aqpannan bastap Eýropaǵa ushatyn barlyq reisin toqtatatynyn habarlady.
