BUU Qaýipsizdik Keńesiniń juma kúni keshke shuǵyl shaqyrylǵan otyrysynda AQSh sońǵy aptada Irannyń kóptegen qalalarynda ótip jatqan narazylyq aktsiialaryna qatysýshy irandyqtarǵa qoldaý bildiretini týraly málimdedi, dep habarlaidy "Ult aqparat" Azattyqqa silteme jasap.
"Azamattyq quqyqtar úkimettiń syiǵa tartqany emes, ol adamnyń tartyp alynbaityn quqyqtary. Iran rejimi qazir baqylaýda otyr. Kúlli álem sizderdiń ne istep jatqandaryńyzǵa kóz tigip otyr", - dep málimdedi AQSh-tyń BUU-daǵy turaqty ókili Nikki Heili. Ol adam quqyqtaryn qurmetteý – sonymen birge beibitshilik pen qaýipsizdik máselesi ekenin aityp, adamdardy negizgi quqyqtarynan aiyrǵan kezde turaqtylyqqa qater tónetindigin eskertken.
"AQSh Irandaǵy "erkindikti, otbasylarynyń jetistigi men eliniń abyroily bolýyn qalaityn" adamdarmen iyq tirestirip birge turady", - degen Heili.
BUU Qaýipsizdik Keńesine múshe elderdiń kópshiligi Irandaǵy adam quqyqtaryn qorǵaýǵa qoldaý tanytqan, sonymen birge Frantsiia, Qytai, Shvetsiia jáne ózge de kei elder Iranda bolyp jatqan jaǵdaidy BUU-da talqylaýdyń qisyndylyǵyna shek keltirgen. Resei men Iran elshileri "Qaýipsizdik Keńesin Irannyń ishki máselesin talqylaýǵa aralastyrýǵa áreket jasap otyr" dep AQSh-ty aiyptaǵan. Olardyń aitqanyna Ulybritaniia men Niderland ókilderi qarsylyq bildirgen.
Iranda infliatsiianyń sharyqtaýy men baǵa qymbatshylyǵy jáne eldegi jemqorlyqqa turǵyndardyń jappai narazylyǵy úkimettiń ishki jáne syrtqy saiasatyna qarsylyqqa ulasty. Sońǵy málimetter boiynsha, narazylyq aktsiialary barysynda keminde 21 adam qaza tapqan. Júzdegen adam ustalyp, qamalǵan. Sonymen birge Iranda bilikke qoldaý bildirý sherýleri de uiymdastyrylyp ótkizildi. Iran memlekettik telearnasy juma kúni eldiń birqatar qalalarynda úkimetti qoldaý sherýine on myńdaǵan adam qatysqany týraly habarlady.
AQSh prezidenti Donald Tramp Irandaǵy narazylyq sherýine shyqqandardy qoldaityny týraly buǵan deiin Twitter áleýmettik jelisindegi paraqshasynda birneshe márte málimdegen.
Iran biligi eldegi narazylyq sherýlerin "syrtqy kúshter uiymdastyrdy" dep biledi.
