Foto: Reuters
AQSh áýe kúshteri Irannyń úsh iadrolyq nysanyna shabýyl jasaǵan, dep habarlaidy Ult.kz.
Bombalaý operatsiiasyna qatysqan ushaqtardyń biri Fordo qalasyndaǵy ýran baiytý zaýytyna «tolyq oq-dári qoryn» tastaǵan. Fordo nysanymen birge Natanz jáne Isfahandaǵy obektiler de shabýylǵa ushyraǵan.
Soqqylardy GBU-57 býnkerge qarsy bombalaryn alyp usha alatyn strategiialyq B-2 bombalaýshylary jasaǵan. Al Izrail soqqylarǵa deiin aldyn ala eskertilgen.
AQSh shabýyldarynan keiin Izraildiń Qorǵanys armiiasy kóshedegi jinalystarǵa jáne kóptegen kásiporyndardyń jumysyna tyiym salý arqyly shekteýlerdi kúsheitip otyr.
Tramptyń ózi de shabýyldan keiin Netaniahýǵa alǵys aityp, olardyń «bir komanda sekildi» jumys istegenin aitty. Bul shabýyldan keiin Tramp ultqa úndeý jasap, «shabýyldy sátti» dep atady. Alaida ol áli joiylmaǵan nysandar bar dep otyr.
Tramptyń sózinshe, AQSh soqqysynyń maqsaty — Irannyń iadrolyq múmkindigin shekteý. Onyń sózinshe, «Taiaý Shyǵystaǵy buzaqy – Iran» endi beibit kelisimge kelýge tiis. Eger Iran máselesi sheshilmese, AQSh jańa soqqylar jasaýǵa daiyn.
Iran biligi AQSh shabýyldaryn rastap otyr. Alaida Irannyń atom energiiasy agenttigi ýran baiytýdy jalǵastyra beremiz deidi, sondai-aq artynsha Izrailge shabýyldaryn jalǵastyrdy. Iemendik hýsitter de AQSh soqqylaryn aiyptap, oǵan jaýap berýge ýáde etti.
Buǵan deiin Áli Hamenei, AQSh aralassa, oǵan jaýap beremiz dep málimdegen. Al BUU bas hatshysy Antoniý Gýterrish AQSh shabýylyn «qaýipti eskalatsiia» dep atady. Ol taraptardy diplomatiiaǵa shaqyrdy.
