Foto: Olympic.kz
Májilis depýtaty, tanymal sportshy Dáýlet Turlyhanov áleýmettik jelide taraǵan ulyna qatysty videoǵa túsinikteme berdi, dep habarlaidy "Ult aqparat".
"Qurmetti qaýym! Búgingi áleýmettik jelilerde meniń ulyma qatysty taraǵan video boiynsha túsinik berýdi jón kórdim.
Ózderińiz biletindei, meniń áýletim ainalasyndaǵy mundai oqiǵalar birinshi ret emes. Osyndai oqiǵalardyń zańdylyqpen qaitalanýy meniń kóńilime eriksiz oi salady. Men óz tarapymnan balalaryma tolyqtai ákelik, qazaqy tárbie berdim. Búgingi videoǵa qatysty meniń de qoiatyn bir suraǵym bar. Tańǵy saǵat 4-te mundai azamatshalar ulym turatyn úige kelip, nege ondai oqiǵaǵa bastaý bolatyny túsiniksiz. Jáne bul jaǵdai aiaq astynan kameralarǵa túsip qalyp, belgili bir adamdarǵa paidaly qiyndylarynyń aqparat quraldaryna taraýy - meniń ǵana emes, kez kelgen adamnyń kóńiline kúmán keltiredi" - dep jazdy ol.
Dáýlet Turlyhanov bul jaǵdai óziniń otbasyna sońǵy jyldary jasalǵan kezekti aqparattyq shabýyl dep oilaitynyn atap ótti.
"Videony ańǵarǵan adamǵa meniń balamnyń bul janjaldan barynsha qashqaqtaýǵa áreket jasaǵany anyq kórinedi. Sizderge túsinikti bolý úshin videonyń tolyq nusqasyn joldap otyrmyn. Osy bolǵan jaǵdaidy durys túsinýlerińizdi suraimyn" - dep túiindedi Turlyhanov.
Aita keteiik, buǵan deiin áleýmettik jeli men messendjerlerde jigit pen qyzdyń arasyndaǵy janjal túsirilgen video taraǵan edi. Belgili jýrnalist Mihail Kozachkov bul oqiǵaǵa Májilis depýtaty Dáýlet Turlyhanovtyń ortanshy ulynyń qatysy bar ekenin habarlady. Osy oraida tilshiler keleńsiz jaǵdaiǵa qatysty depýtattyń pikirin bildi.
«Jastar ózderi sheshedi. Bir-birin jaqsy kóretin bolar», - dedi Turlyhanov Parlament Májilisiniń jalpy otyrysynan keiin tilshiler suraǵyna jaýap berip.
Bul rette depýtat atalǵan jait týraly estimegenin jáne ulymen sóilesetinin aitty.
«Olar - eresek adamdar. Sondyqtan ózderiniń máselesin sheshedi dep sanaimyn. Bul jańalyqty sizderden estip otyrmyn jáne men úshin jaǵymsyz jańalyq bolyp tur», - dedi Dáýlet Turlyhanov.
