Aqparat jáne qoǵamdyq damý ministrliginde onlain formatta jáne jańartylǵan quramda Aqparat jáne qoǵamdyq damý salasyndaǵy qoǵamdyq keńestiń kezekti otyrysy ótti, dep habarlaidy "Ult aqparat" atalmysh vedomostvonyń baspasóz qyzmetine silteme jasap.
Atap aitqanda, «Qoǵamdyq keńester týraly» QR Zańyna sáikes Qoǵamdyq keńes múshelerin sailaý týraly konkýrs ótkizilip, quramynyń úshten bir bóligi jańartyldy.
Konsýltativtik-keńesshi organnyń quramyna Qazaqstan Respýblikasyndaǵy Adam quqyqtary jónindegi ýákil Elvira Ázimova, QR Parlamenti Májilisiniń depýtaty Vera Kim, «Zertteu Research Institute» qoǵamdyq qorynyń direktory Sholpan Aitenova, Qazaqstandaǵy parlamentarizmdi damytý qorynyń prezidenti Záýresh Battalova, «Ulttyq aýdarma biýrosy» qoǵamdyq qorynyń direktory Raýan Kenjehanuly, «Qazaqstannyń azamattyq aliansy» ZTB tóraǵasy Baný Nurǵazieva, «Bilim-innovatsiia» halyqaralyq qoǵamdyq qorynyń prezidenti Darhan Óte men «Ahyska» túrik etnomádeni ortalyǵynyń Nur-Sultan qalalyq filialynyń tóraǵasy Ásker Piriev jáne t. b. belgili qairatkerler men úkimettik emes sektordyń ókilderi kirdi.
Sonymen qatar, Qoǵamdyq keńestiń tóraǵasy Qýanysh Sultanov Qoǵamdyq keńestiń quramynda da, basshylyǵynda da rotatsiia júrgizý qajettigi týraly atap ótip, osyǵan bailanysty óziniń Qoǵamdyq keńes tóraǵasy retinde ókilettigin toqtatatynyn málimdedi.
Qýanysh Sultanovtyń pikirinshe, bul sheshim Qoǵamdyq keńestiń jumysyna jańa serpin beredi.
Aqparat jáne qoǵamdyq damý ministri Aida Balaeva Qýanysh Sultanovqa jemisti jumysy úshin alǵysyn bildirdi.
Ashyq daýys berý barysynda Qoǵamdyq keńestiń tóraǵasy laýazymyna QR Parlamenti Májilisiniń depýtaty Darhan Myńbai sailandy.
Qoǵamdyq keńes otyrysynyń barysynda 2021 jyldyń ekinshi jartyjyldyǵyna arnalǵan jumys jospary talqylandy. Qoǵamdyq keńes músheleri din salasynda júrgizilip jatqan memlekettik saiasat, ABQO qyzmeti jónindegi máselelerdi qaraý jáne «Halyq únine qulaq asatyn memleket» tujyrymdamasyn talqylaý týraly usynystar engizdi.
