Aqparat jáne qoǵamdyq damý ministrligi aldaǵy jumysynda salalyq jýrnalisterdi daiarlaýǵa basymdyq bermek. Bul týraly Astana Media Week 2020 sharasynyń «Pandemiia jáne BAQ-qa senim daǵdarysy» plenarlyq sessiiasynda Aqparat jáne qoǵamdyq damý vitse-ministri Kemelbek Oishybaev málim etti, dep habarlaidy QazAqparat.
«Pandemiiaǵa bailanysty biz salalyq jýrnalistikany kúsheitý kerektigin kórip otyrmyz. Belgili bir taqyrypty keńinen biletin jýrnalister sol salanyń kópshilikke qyr-syryn tereńinen túsindirip bere alady. Ásirese pandemiia ýaqytynda meditsina salasynyń jýrnalisteriniń mańyzy aiqyn kórindi. Sebebi keide qoǵamnyń tynyshtyǵy jýrnalistiń kásibi túrde túsindirip bergen materialyna bailanysty bolady. Ókinishke qarai, ártúrli úreili rolikterdi taratqan «sarapshylar men spikerlerdi» kórdik. Olar jantalasa jan-jaqqa ártúrli messedjderdi taratýmen boldy. Osy arqyly qoǵamǵa dúrbeleń týdyrǵysy kelgender kezdesti», - dedi Kemelbek Oishybaev.
Vitse-ministrdiń aitýynsha, salalyq jýrnalister jetkilikti bolǵan jaǵdaida, jaǵdai bulai shielenispes edi.
«Sondyqtan Aqparat jáne qoǵamdyq ministrligi dál osy salalyq jýrnalisterdi daiarlaýdy óz jumysynyń basymdyǵy retinde aiqyndap aldy. Biz L.Gýmilev atyndaǵy EUÝ-men jáne Ál-Farabi atyndaǵy QazUÝ-men memorandýmǵa qol qoiyp, salalyq jýrnalisterdi daiarlaý josparyn da quryp qoidyq. Osy baǵytta tipti institýttar men ýniversitetter oqytý ádistemesin de ózgertip jatyr», - dedi ol.
Aita ketsek, eloradada Astana Media Week 2020 sharasy ótkizilýde. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Media aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jinap keledi jáne ózekti taqyryptar talqylanady.
